2023 SACOM-TL Sei Dada Kabu-Sub-Marinu Husi Alor Mai TL

Naunil Media (Díli), Prezidente SACOM Enerjia Abílio Araújo hateten fulan Abríl tinan 2023 SACOM-TL sei dada Kabu-Sub-Marinu husi Alor Norte mai iha Timor-Leste (TL), ne’ebé ho investimentu privadu.

“Iha Norte Alor SACOM-TL dada ita nia kabel ida, dada husi Alor Norte mai too Timor nia fatin iha Tibar, ida ne’e investimentu ida 100% privadu/Swasta ne’e mak ami mai aprezenta i mós ita nia kabu ida ne’e liga ba kabu Internationál grupu ne’ebé naran Ázia Conecte Cabel (ACC),” dehan Abílio Araújo ba Jornalista sira hafoin remata enkontru ho Prezidente Repúblika (PR), José Manuel Ramos Horta iha palásiu Prezidensiál Nicolau Lobato Bairu Pite, Kinta, (23/06).

Abílio Araújo hatutan, Cross Broder Fiber Optika mak dada husi fronteira no dadaun ne’e hahú dada ona, agora dezenvolve ona baze iha Batugade, nune’e tasi nian ne’e hahu dada husi Singapura no tempu di’ak atu dada mak tenkeser iha Abríl, ne’ebé Abríl tinan oin preparadu atu dada, kustu ba projetu ne’e variavel investimentu totál hamutuk ne’e mak 800 miloens.

Líder 1975 ne’e hateten, Kabu sub marinu ne’e dada husi tasi Alor nia oin ne’e mak bolu SACOM-TL Timor-Leste Cabel, agora ida dada husi Atambua ne’e mak Cross Broder Fiber Optika Cabel ne’e dada husi rai maran rua ne’e dezenvolve agora dadauk.

Nia esplika, Ho kabel sub marinu ne’e Timor-Leste bele dezenvolve data center ida ne’ebé sei buka mós empreza boboot husi mundu tomak bele mai haloot sira nia data iha ne’e tanba ho paíz ida ho data center boot liu mak Singapura maibé Singapura agora nakonu ona tanba enerjia power iha Singapura agora la too atu simu tan data center foun.

Nia dehan, Ho investimentu ida ne’e mós Timor-Leste sei hala’o dezenvolvimentu ekonomia dizital iha Timor-Leste no mós bele sai fali sentru ba data center ne’e sei tau fatin iha TL.

Depois Abílio Araújo ho ekipa aprezenta dadus sira ne’e ba Prezidente Repúblika no Xefe Estadu mós kontenti, wainhira ko’alia kona-ba dezenvolvimentu atu ba oin. *Jos