Inan-Aman ho Professores Halo Lutu Haleu EBF 30 de Agusto
Naunil Media (Lautém), Sesta (01/07) ne’e, reprezentante família, inan-aman husi estudante sira hamutuk ho manorin nain sira (professor/a) halo lutu ba Ensinu Bázika Filial (EBF) 1,2 30 de Agosto, hodi asegura estudante sira husi risku no evita animal labele tama area eskola.
Reprezentante Diretor EBF 30 de Agusto, Carlos Dias Quintas, informa eskola konvida inan-aman sira nia kolaborasaun di’ak tebes, sira (inan-aman) lori ai-gamal hodi kuda haleu eskola.
“Ami halo lutu atu animal labele tama area eskola nian no komunidade sira labele kesi karau no kuda iha area eskola”, Reprezentante Diretor da Eskola EBF 1,2 30 de Agusto Lospalos, Carlos, ba www.naunil.com iha kna’ar fatin.
Nia hateten, tanba transporte públiku sira mos halo movimentu liu husi area eskola nian entaun eskola ho inan-aman sira halo lutu atu hado’ok estudante sira husi dezastre.
“Lutu uza ai-gamal ne’e komesa tinan sanulu (10) resin ona maibe tanba lutu ne’e hetan estagus bebeik husi Animal entaun kada tinan ami halibur Inan-aman sira atu kuda nafatin ai-gamal haleu eskola”, tenik Carlos.
Ikus nia hateten, ba futuru eskola ho Inan-aman sira prontu atu halo kontibuisaun nune’e bele halo lutu uza Batako no rede. Mj2
