UPF-F-FDTL Prende Kareta Rua Halo Transaksaun Ilegal Iha Fronteira
Naunil Media (Maliana), Polísia Nasionál Timor-Leste (PNTL) liu husi Unidade Patrullamentu Fronteira (UPF) Kompanhia Alfa, hamutuk ho F-FDTL halo patrulla la’o ain konsege deteta kareta rua halo transasksaun ilegal iha Maliana, Munisipiu Bobonaro ne’ebe fronteira besik kedas Indonezia.
Tuir Komandante UPF, Superintendente Polisia Euclides Belo, hateten nia membru konsege halo kapturasaun ba sidadaun nain hirak ne’ebe halo transaksaun ilegal iha liña fronteira.
“Los duni ita nia membru Servisu Sekreta hamutuk ho F-FDTL halo vizilansia no identifika transaksaun ilegal iha area Nunura no halo kedas aprensaun ba kareta rua ho marka Avanza no Carry hamutuk ho evidensia sira mak hanesan, gazoel 35 ltr masa hamutuk 25, sigaru marka Armour Black kaixa 4 (kartolina 320 hamutuk 3200 kaixina) maka ita prende”,dehan Komandante Euclides Belo, iha nia Kuartel UPF Nu Badak, Segunda (04/07).
Nia afirma, bazeia ba informasaun ne’ebe rekolla sasan hirak ne’e lori tama hosi fronteira Indonezia nian.
“Oras ne’e,daudaun ita entrega ona sidadaun sira hamutuk ho evidensia ba Komandu PNTL Munisípiu Bobonaro hodi kontinua ba prosesu investigasaun no sei prosesa tuir lei ne’ebe vigor iha ita nia nasaun,”hakotu nia. Ana
