Nelgimia-Konsultan “Survey” Estrada Tirilolo

Naunil Media (Iliomar), Sábadu (02/07) ne’e, ekipa tekníku husi Kompañia lokál Nelgimia Unip. Lda ho konsulta kompañia parseiru Governu hala’o “survey” ba projetu estrada ligasaun Iliomar ba Suku Tirilolo.

Tuir observasaun www.naunil.com, ekipa tekniku kompañia lokál ho konsultan Governu, Ministériu Obras Públika nian tun iha area entrada projetu hosi Hilari (00 km) tama Suku Tirilolo to’o final iha Larimi ho distansia kuaze kilometru 9.

Enkuantu estrada ne’e area jurídiku Suku Tirilolo nian, maka iha momentu ne’ebé autoridade Suku, Aldeia no komundade balu antoziais hodi partisipa “survey” estrada no ponte tolu ne’ebé durante ne’e defikulta tebes ba komunidade suku refere.

Iha biban ne’eba, Xefe Suku Tirilolo, Adão Teles, lori autoriade suku, aldeia no povu tomak, hato’o agradese ba vizita konsultan Governu ho kompañia lokál haree konstrusaun estrada.

Entaun aproveita oportunidade ne’e Adão, husu ba Governu, liu-liu Ministériu Obras Públika atu aselera prosesu konstrusan estrada no halo ponte tolu ne’ebé durante ne’e defikulta tebes povu asesu edukasaun, saúde no merkadu.

“Uluk nana’in ha’u agradese ba konsulta Governu ho téniku kompañia Nelgimia, problema estrada no ponte ne’e dezde uluk ukun an to’o mai agora povu halerik beibeik, maibé foin primeira vés ita bo’ot sira mai para atu halo buat ruma ba komunidade Suku Tirilolo ida ne’e”, Xefe Suku Tirilolo, Adão, informa iha Sede Suku, Postu Administrativu Iliomar, Munisípiu Lautém.

Durante ne’e povu suku Tirilolo hasoru defikuldade labele asesu merkadu, etudante sira la bele asesu edukasaun no la bele asesu postu saúde tanba udan tun mota tolu ne’e boot defikulta tebes ba sira.

Xefe Suku garantia bainhira Governu, liuhosi MOP ho parseiru mai kontroi estrada, ponte tolu ne’e laiha problema to’o remata Tanba povu rasik mak husu governu.

“Nu’udar autoridade ha’u garantia ba na’i sira katak bainhira projetu ne’e la’o sei laiha problema to’o remata, tanba ita nia inan-aman sira iha suku ne’e mak husu rasik ba governu atu aselera konstrusaun ne’e”, Xefe Suku Adão hateten.

Iha fatin hanesan Konsultan Parseiru Governu, Paul Rodriques “Mate-Kruz” hatete, prosesu la’o ona tanba ne’e nia prezensa hamutuk ho kompañia Nelgimia ne’e mai atu halo sosializasaun ba komunidade kona-ba problema sira ne’ebé mak durante ne’e povu enfrenta.

“Ohin loloos ha’u hamutuk ho ita nia ministru obras públiku iha Munisípiu Vikeke, maibé ami tenke mai iha Suku Tirilolo hodi haree no sosializa komunidade kona-ba ita nia halerik ne’ebé povu sira enfrenta hamutuk atu rezolve”, Konsultan Parseiru Governu, Paulo hateten.

Nia afirma, durante ne’e dokumentu projetu kontrusaun estrada Tirilolo iha ona MOP. Enatun bazeia orientasaun Primeiru Ministru atu haruka konsulta tun hodi survey no halo relatoriu ikus kompañia ho autoridade Suku Tirilolo no komunidade hamutuk lori ba PM hodi hatún despaxu hodi realiza projetu ida ne’e.

“Ida ne’e mak agora ita mai iha ne’e para ita bele ko’alia hamutuk. Se obra ne’e la’o ona iha tempu ruma la bele iha problema entre ita ho komunidade, ita ho kompañia ka’er projetu”, nia esplika.

Konsultan Governu ne’e afirma, kompañia internasionál sira ne’e mai para atu investe entaun xefe Suku, Xefe Aldeia no komunidade Suku Tirilolo tomak tenke koopera hodi asegura para projetu ne’e bele implementa lalais hodi nune’e povu sira utiliza.

Entretantu Reprezenta Kompañia lokál Nelgimia Unip. Lda, Rosinda Moniz, reforsa tan husu lider autoridade Suku no aldeia atu bele aviza ninia komunidade atu koopera ho kompañia Internasionál parseiru governu ne’ebé atu kontroi estrada no halo ponte ba povu suku Tirilolo.

“Ha’u atu aumenta uitoan, projetu ne’e vise ministru obras públiku haree ona, agora ita nia konsultan mós to’o mai, ita hotu servisu hamutuk atu kuida kompañia ne’e implementa projetu ne’e ho susesu, nune’e inan-aman sira bele uza”, nia hakotu. *Tri