PR Horta : ELPAR 2023 Timor Oan Vota Ho Dame
Naunil Media (Ainaru), Prezidente Repúblika (PR) José Ramos Horta hateten Eleisaun Parlamentár (ELPAR) ne’ebé sei monu iha tinan 2023 Timor oan hotu bele kolabora atu labele iha Instabilidade nune’e labele fó impaktu ba ekonómia no povu nia moris.
Xefe Estadu hato’o lia hirak ne’e liu husi diskursu bainhira halo dialogu ho komunidade Ainaru, Sexta, (05/08) ne’ebé ho tema Kultura ba Dame.
“Halo diálogu, hodi rona imi nia preokupasaun ruma, mai ho membru guvernu, ha’u hahu hateten, ita besik ona eleisaun parlamentár foun atu mai, ita hotu bele kolabora atu labele iha instabilidade, atu labele fó inpaktu ba ekonomia no povu nia moris, nune’e iha inísiu hanesan Prezidente, ha’u buka kedas diálogu nasionál ho líder sira, Prezidente Parlamentu, Primeiru Ministru liu-liu ba assuntu ne’ebé hau preokupa, tamba sai Prezidente di’ák presija hetan informasaun husi guvernu no buka diálogu ho guvernu,’’ dehan Xefe Estadu
Prezidente Repúblika mós konsidera diálogu ho tema “Kultura Ba Dame” hanesan biban ida atu komunidade aprezenta sira nia preokupasaun ba governu no mós hametin kultura dame iha sosiedade, relasiona ho eleisaun parlamentar iha tinan 2023.
PR mós sei realiza programa Tour de Timor, Dili Marathona, Festival Kultura Ramelau no seluk tan, hodi kontribui ba promosaun dame, paz no estabilidade hodi ajuda governu hodi hala’o prosesu dezenvolvimentu.
‘’Iha primeiru prezidensial 2007, ita foin sai husi krize, ha’u kria Tour de Timor, Marathona Internasionál, Festivál Ramelau, Kail, até halo konkursu prezepiu, nu’udár promosaun ba dame iha Timor ba Mundu, atu tane guvernu hodi kria unidade iha rai laran nune’e, husik guvernu fokus ba dezenvolvimentu iha rai-laran,’’ tenik PR
Horta hateten maske iha tinan 2019 to’o 2021, atual Xefe Estadu ne’e la iha pozisaun polítika, maibé kontinua apoia governu hodi kombate COVID-19 iha Timor-Leste.
“Krize bo’ot iha mundu, inpaktu bo’ot ba guvernu, entaun ita buka atu tane malu atu povu labele hamlaha, ekonomia tenke ba oin tamba ekonomia la laó ba oin, mundu agora krize. Ita tinan ida ho balun tan, ita atu tama ASEAN,” subliña Horta
Aman ba nasaun ne’e mós husu ba partidu polítiku no membru Grupu Arte Marsiais sira atu kria diálogu, nune’e bele simu malu hodi hadi’a naksalak husi violénsia ne’ebé mosu, nune’e mós relasiona ho programa nutrisaun, Xefe Estadu promote atu apoia governu, hodi kombate subnutirsaun iha Timor-Leste.*Jos
