Ainaru Estrada Ladi’ak Implika Difisiensia Balun Lakon Direitu
Naunil Média (Ainaru), Administradór Postu Administrativu Ainaru Vila Agapito de Fatima hateten estrada husi postu administrativu sira mai Ainaru vila ladiak tanba ne’e idozu no ema ho Difisiensia balun lakon sira nia direitu.
“Tinan ne’e selebrasaun loron proklamasaun 2022, sei hala’o iha Ainaru, maibé ami nia estrada husi postu mai vila la diák, nune’e mos idozu no ema ho difisiénsia balun lakon direitu, mal-nutrisaun kontinua-ás tambá estrada ladiak hodi ajuda, no Ainaru nafatin tane malu,” dehan administradór postu administrativu Ainaru vila bainhira halo dialogu ho Prezidente Repúblika (PR) José Ramos Horta, Sexta, (05/08).
Iha dialogu ho komunidade Ainaru ne’e Administradór husi Postu administrativu Maubisse, Hatubuilico, Hatu’udo, no Ainaru vila aprezenta Preokupasaun komunidade sira nian liuliu estrada, eletrisidade, bee moos, saúde no seluk tan.
Autoridade lokal ne’e mós preokupa kona-ba possibiliade produsaun petróleu husi Bayu-Undang ne’ebé atu maran iha tempu besik, maibé Prezidente Repúblika responde katak, governu dadaun ne’e luta hela atu dada kadoras mai Timor-Leste.
Diálogu ne’e partisipa husi Membru governu, autoridade lokál, veteranu no komunidade husi Munisípiu Ainaru.
Nune’e mós tuir sensus 2010, Ainaru iha abitantes 59.175 mil no iha potensialidade ba seitor argikultura no turizmu, durante okupasaun Indonésia, àrea barak iha Ainaro sai abrigu ba guerilleiru sira to’o ukun an. *Jos
