Governu Rona Vizaun PR Ba Dezenvolvimentu TL
Naunil Media (Díli), Governu rona vizaun Prezidente Repúblika (PR) José Ramos Horta, atu bele operasionaliza kona-bá vizaun bo’ot sira ne’ebé importante ba dezenvolvimentu Timor-Leste (TL) iha futuru.
Kestaun ne’e haktuir husi Ministru Prezidensia Konsellu Ministru (MPKM) Fidelis Manuel Leit Magalhas ba jornalista sira hafoin ho ekipa enkontru ho Xefe Estadu José Ramos Horta iha palásiu Prezidensiál Nicolau Lobato Bairru Pite, Tersa (16/08).
“Mai atu rona vizaun sua excelensia Prezidente Repúblika nian, no oinsá atu bele operasionaliza parte ezekutivu nian ho vizaun hirak ne’e, ne’ebé kona-ba vizaun bo’ot sira, kona-ba Timor-Leste nia futuru, kona-bá dezenvolvimentu seitór sira ne’ebé importante ba rai ida ne’e”, dehan MPKM.
Membru governu ne’e hatutan, Prezidente Repúblika liu husi enkontru semanal hato’o ona ba Primeiru Ministru no atu reforsa liu tan parte tékniku, no implementasaun nian mak ohin hanesan Ministru Prezidensia Konsellu Ministru, Ministru Koordenador Assuntu Ekonómiku, Ministru Finansas atu haree parte legal juridiku konstitusionál, ekonómia, finansas diskuti ho Xefe Estadu atu bele iha sinerjia.
Fidelis hateten, Sinerjia di’ak liu entre governu liu husi lideransa (PM) Taur Matan Ruak, ho parte Prezidente Repúblika José Ramos Horta ho nia ekipa téknika sira, tanba ne’e governu halo artikulasaun ida hodi hatudu rezultadu relasaun institusionál ne’ebé metin entre orgaun soberania sira.
“Entaun ita halo artikulasaun ida ne’e para hatudu katak para lori duni rezultadu i sinal ida hatudu katak relasaun institusionál ne’ebé metin liu entre orgaun soberania nian, entaun ami mai para rona vizaun hirak ne’e ha’u lori hanesan bukae no ami nia téknika sira mós anota, hotu halo parake iha tempu badak ita bele halo transforma vizaun hirak ne’e sai realidade hanesan estadu ida”, tenik Fidelis.
Nia dehan, Diskusaun ho xefe estadu ne’e iha area barak mas o que sertu área hirak ne’e relasiona koordenasaun ho polítika jerál governu nian, no polítika lejislativa sira governu parte juridika nian, ideias ohin barak mak anota, diskuti no konversa ho klean.
Iha enkontru ne’e Prezidente Repúblika mós hakarak Timor-Leste tenke ba oin, agora iha vizaun sira que kuandu xefe estadu ko’alia ho nasaun sira seluk no mós vizaun rasik nia xefe estadu nian, nune’e hanesan parte ezekutivu tenke halo vizaun hirak ne’e ho nia pontus-pontus sira halo ezekusaun ne’ebé di’ak no artikulasaun ne’ebé di’ak no efikas. *Jos
