Funsionariu PR Remata Formasaun Protokolu
Naunil Media (Díli), Funsionáriu Prezidénsia Repúblika na’in-26 remata ona formasaun bázika bá protokolu durante loron lima, husi loron 26 to’o 30 fulan Setembru tinan ida-ne’e, iha Palásiu Nobre Lahane.
Formasaun ne’e atu kria imajen pozitivu husi palásiu PR nian, hodi dezenvolve instituisaun ne’e, tuir kultura no étika servisu profesional, liu hosi prosedimentu protokolu ida iha padraun no adekuadu.
Xefe Kaza Sivil Prezidénsia Repúblika, Bendito dos Freitas konsidera, formasaun ne’e pertinente tebes, koinsidénsia mós ho esforsu Timor-Leste atu adere ba ASEAN.
“Ita tama ASEAN servisu protokolu ne’e makas liu, tanba ne’e mak MNEK hamutuk ho ita sei iha formasaun tan servisu makas, tanba delegasoens, komferénsias ne’ebé presiza atendimentu protokolár ne’ebé sufistikadu oituan, integradu,” dehan liu husi Komunikadu ne’ebé Naunil Media assesu iha Prezidensiá Repúblika, sabadu (01/10).
Bendito Freitas haksolok tebes, tanba foin tama Palásiu PR, hahú ho passu dahuluk liu husi formasaun bázika bá funsionáriu sira hodi eleva liután kuiñesimentu funsionáriu protokolu nian.
Sorin seluk, Reprezentante Formandus, José Violante da Silva Reis, lori formandus 26 nia naran agradese bá Xefe Kaza Sivil no mós formadora sira husi MNEK ne’ebé fasilita formasaun protokolár nian bá sira durante loron lima ne’e.
“Ami-nia objetivu mai iha ne’e atu upgrade ami-nia knowledge, ami-nia skills ho ami-nia atitude kona-bá servisu protokolu nian,” hatene José Violante.
Entretantu, matéria espesífiku ne’ebé formadora sira oferese ba formandus sira mak hanesan, jestaun dokumentu no arkivu, nomos maneira atendimentu no guia bainaka VVIP no VIP sira iha serimónia ofisiál ruma.
Formadora bá formasaun ne’e mai husi Ministériu Negósiu Estranjeiru no Kooperasaun (MNEK), na’in-rua mak hanesan, Eis Diretora bá Assuntu protokolár MNEK no atuál Diretora bá Assuntu ASEAN Elisa da Silva, nomos Elda Ferreira.
Formasaun refere taka ho prátika simulasaun kona-ba servisu protokolár nian iha serimónia jantar estadu nian ne’ebé hala’o iha Palásiu Nobre Lahane. *Jos
