SIP-SNI No Esquadra Cristo-Rei Kaptura Gam Na’in12 Ho Evidensia Sasan Kroat
Naunil Media (Díli) Sexta(9/12/22), Servisu Relasaun Públikas (RSP)simu informasaun hosi fontes akreditadu, Xefi Servisu Informasaun Polísia Nasionál (SIPN), orienta ekipa servisu sekreta parte leste hamutuk ho Servisu Nasionál Intelijensia (SNI), junta ho Forsa Rezerva no ekipa Patrulla PNTL Esquadra Cristo Rei, kaptura membru Grupu Arte Marsiál (GAM) hosi organizasaun Presaudaraan Setia Hati Terate (PSHT) na’in-11 no na’in-1 seluk hosi Organizasaun Ikatan Kera Sakti (IKS) ne’ebé viola Lei númeru 5/2017, pratika Arma Branka ne’ebé defini iha artigu 2 númeru 1 koalia kona-bá katana, espada no rama ambon, iha Aldeia Kakeu-Laran, Suku Becora, Postu-Administrativu Cristo-Rei, Munisipiu Díli.
PNTL halo kapturasaun ba joven hirak ne’e iha oras tuku 11:50 kinta kalan tanba iha tendensia atu ataka malu entre joven no iha fatin akontesementu ekipa asegura mos sasan kroat sira hanesan Katana (tipu samurai-1), maubeka naruk-1, tudik-2, besi kanu-1, tizoura tesi besi-1, besi beton 12 mili-1 fizka-3 ho kedas besi beton ne’ebe tesi badak ona inklui fatuk hodi lansa iha vizka iha pasta ida nia laran.
Tuir deklarasaun husi reprezentante Grupu Arte Marsiais PSHT ne’ebé hetan kapturasaun, katak nia kuñese di’ak suspeitu na’in 10 ne’ebé mak hamutuk ho joven balu mai husi bairo seluk tuda uma no sira ne’e husi organizasaun Arte Ritual 77 ne’ebé akontese kalan-kalan hahú kedas iha loron segunda, to’o agora no kazu ne’e sira informa ona suspeitu sira nia naran ba PNTL Esquadra Cristo Rei no ohin kalan kontinua tuda tan fali sira tanba ne’e sira sai ho sasan kroat.
Relasiona ho Armas Brancas ne’ebé mak sira lori, reprezentante ne’e hateten katak sasan kroat ne’e sira prepara de’it atu salva sira nia an, karik Grupu 77 sira ba ataka iha sira nia bairo laran nune’e sira iha biban halo atake hasoru.
Hafoin rona deklarasaun hirak ne’e ekipa halo prevensaun asegura kedas joven hirak ne’e ho sasan kroat sira no lori ba Esquadra PNTL Cristo Rei hodi halo prosesu identifikasaun no kontinua halo auto entrega ba Servisu Investigasaun Kriminal iha Komandu PNTL Munisípiu Díli no halo detensaun durante 12h no sei kontinua halo prosesu investigasaun. Gyor
