𝐒𝐄𝐊𝐎𝐌𝐒 Siensibiliza 𝐊𝐨𝐦𝐛𝐚𝐭𝐞 𝐇𝐎𝐀𝐗 𝐧𝐨 𝐏𝐫𝐨𝐦𝐨𝐯𝐞 𝐈𝐧𝐭𝐞𝐫𝐧𝐞𝐭 𝐒𝐚𝐮́𝐝𝐚𝐯𝐞𝐥 𝐛𝐚 𝐄𝐬𝐭𝐮𝐝𝐚𝐧𝐭𝐞 𝐍𝐢𝐧𝐨 𝐂𝐨𝐧𝐢𝐬 𝐒𝐚𝐧𝐭𝐚𝐧𝐚, 𝐄𝐫𝐦𝐞𝐫𝐚

Naunil Media (Ermera), Sekretaria Estadu ba Komunikasaun Sosiál, Hala’o Kampaña Nasionál Kombate HOAX no Promove Internet Saúdavel, liu husi Sensibilizasaun Literasia Dijitál, ho objetivu atu minimiza lia falsu (HOAX) ba Estudantes Sekundáriu Jerál Nino Conis Santana, iha Postu Administrativu Gleno, Munisípiu-Ermera, Tersa (07/03).

VIII Governu lideradu husi Jenderal Taur Matan Ruak liu husi SEKOMS nafatin tau prioridade ba Kampaña Nasionál Kombate HOAX no Promove Internet Saúdavel, Liu husi Sensibilizasaun Literasia Dijitál, hodi fo apelu ba sidadaun hotu atu utiliza internet ho saudavel no labele tanba internet maka save hodi hetan matenek wainhira utiliza ho pensamentu kritiku no matenek.

Lia falsu ne’ebé agora dadaun lao hela iha sidadaun sira leet tenki verifika didiak tanba informasaun balun laloos (Hoax) hodi desakredita Governu nomos hamosu rumoris oioin husi individu ka grupu ne’ebé laiha responsabilidade. Tanba agora era dijitál entaun sidadaun sira tenki utiliza plataforma dijitál ho matenek hodi kontribui ba dezenvolvimentu Timor-Leste nomós muda karateristika sidadaun nian, tuir istilu moris no sivilizasaun.

Tuir Sekretáriu Estadu ba Komunikasaun Sosiál, Merício Juvinal dos Reis “AKARA”, hateten Governu liu hosi SEKOMS kontinua promove edukasaun sivika ba sidadaun sira hodi uza plataforma dijitál ho efetivu, sivilizadu tamba Governo nia posisaun hodi utiliza plataforma dijitál ba umanidade.

“Ita hotu hatene agora ne’e era dijitál, plataforma hotu ho dijitál, iha parte pozitivu no negativu ho kampaña ida ne’e bele enkoraja sidadaun sira hotu utiliza plataforma dijitál ho matenek, hodi divulga informasaun loos no kredivel kona-ba lalaok dezenvolvimentu iha ita nia rai, moris iha sosiedade nia laran, no mós oinsá ita hotu hamutuk hodi dezenvolve unidade nasionál iha ita nia rai, tanba meius komunikasaun sosiál agora, bele mós provoka dizarmonia, paniku iha ita nia leet, dezentendimentu, no mós halo ita la fiar malu, dehan “AKARA”.

Estadu liliu Governu iha dever atu proteje sidadaun husi informasaun falsu ka HOAX, SEKOMS sei kontinua nafatin hala’o literasia dijitál ba eskola hotu hotu, SEKOMS tau nafatin importansia ba estudante sira, Tanba tuir dadus ne’ebé mak iha, kuaze 70% utilizador média sosiál, hanesan FB, Instagram, Tiktok, Youtube nsst, ne’e maiória jovem mak uza. Governu sei la bandu, jovem no estudante sira, hodi utiliza plataforma média hirak ne’e, Tanba ne’e Direitu sidadaun nian, tanba era dijitál agora lori direitu foun ema hotu hodi utiliza Internet. Hateten “AKARA”

“Se ita koa’lia plataforma dijitál sei la sses husi infraestrutura internet, entaun Governu sei asegura nafatin direitu ida ne’e, maibé Governu mós iha responsabilidade, atu prepara sidadaun, atu labele utiliza sala plataforma hirak ne’e” dehan “AKARA”.

Governu nafatin enkoraja sidadaun sira liuhosi edukasaun sivika, kolabora ho autoriedade liuliu diretór no professors eskola sira, para loronloron hanorin estudante sira liuhosi materia edukasaun sivika, multimédia, ne’ebé mak kada eskola iha, estudante sira iha skill, kapasidade, pensamentu kritiku hodi utiliza. Governu nia hakarak mak sidadaun Timor-Leste, hotu hotu iha kapasidade, skill utiliza média sosiál ho pozitivu no matenek, hodi promove rai ida ne’e, e sai mós diplomata, no promove ba nasaun no mundu kona-ba Dezenvolvimentu Timor nian, Hateten ‘’AKARA”

Entertantu Prezidente Konsellu Imprensa, Otelo OTE, hateten katak, Promove Liberdade Imprensa no Liberdade Espresaun iha ambitu transformasaun dijitál iha Timor-Leste hateten, iha Konstituisaun RDTL Asegura liberdade Imprensa no liberdade Espresaun hakerek iha artigu 40/41 asegura liberdade fo espasu ba ema hotu atu espresa nia liberdade.

Lider numero 1 iha Konsellu Imprensa neé reforsa tan katak KI nafatin kopera ho SEKOMS hodi fahe informasaun liu husi Kampaña Nasionál Kombate HOAX no Promove Internet Saúdavel, Liu husi Sensibilizasaun Literasia Dijitál ne’ébé durante ne’e lao ona.

Iha fatin hanesan, Reprezentante Plan Internasionál iha nia aprezentasaun kona-ba Grafiku utilizador plataforma dijitál iha Timor-Leste, dala barak Feto mak sai vitima iha média sosiál. Tanba ne’e, ONG Plan Internasionál enkoraja jovem sira atu utiliza plataforma dijitál ho matenek.

Diretór Eskola Nino Coni Santana, Clementino Madeira, agradese ba SEKOMS bele hala’o kampaña Nasionál Kombate HOAX no Promove Internet Saúdavel liuhosi Sensibilizasaun Literasia Dijitál, ba Estudante Sekundária Nino Conis Santana, hodi hasa’e nafatin estudante nia koñesimentu liuhosi utiliza Plataforma dijitál ho matenek.

Iha sesaun diversos, Estudantes Sekundáriu Jerál Nino Conis Santana, husu ba SEKOMS, tamba sa maka mosu id falsu?

Resposta badak husi SEKOMS katak ID falsu ne’e kria husi individu no grupu, ne’ebé laiha responsabilidade hodi dezakredita lider sira, Governu nomos utiliza media sosiál hodi fahe informasaun falsu (HOAX) ba publiku. “ ID falsu maka sira ne’ebé taukten no buka lukru” husu ba sidadaun hotu karik hetan ameasadu ba vida nomos dignidade husi id falsu lalais informa ba iha ona Polisia Nasional Servisu Investigasaun Kriminal (PNSIK) nomós Polisia Cientifika investigasaun Criminál (PCIC) hodi buka tuir, tanba agora dadaun elabora hela dadus id falsu.

Estudante sira husi Nino Conis Santana sira mós agradese ba SEKOMS, no sira sujere ba SEKOMS atu hala’o nafatin kampaña Nasionál HOAX no Promove Internet Saúdavel ne’e ba Inan Aman sira, atu bele komprende no eduka oan sira utiliza plataforma dijitál ho matenek. Ana