PR Horta Prefere Kompozisaun Governu Da-sia Ki’ik
Naunil Media (Díli), Prezidente Repúblika (PR), José Ramos Horta, hateten tuir planu Kinta-feira (29/06) ne’e sei enkontru ho Primeiru Ministru Indijitadu hodi simu lista membru Governu da-sia ne’ebe atu simu posse, tanba ne’e prefere kompozisaun Governasaun foun di’ak liu ki’ik.
“Aban sei enkontru ho Primeiru Ministru indijitadu no sei simu lista membru governu, ha’u prefere governu ida ki’ik, ha’u rona maun bo’ot mós uluk ko’alia ami hakarak governu ida ki’ik, ha’u hakarak governu ida ki’ik maibé ha’u la interfere ida ne’e”, PR Horta ba jornalista sira iha Salaun VIP Aeroporto Internasionál Nicolao Lobato, Komoro, Kuarta (28/06).
Xefe Estadu Timor-Leste, Horta, fó hanoin ba partidu mais votadu atu koloka ema assume kargu Governasaun foun refere tenke tuir nia-kompeténsia, iha esperiensia professional no akadémiku.
“Preoridade númeru ida mak esperénsia professional, segundu mak haree took alende esperénsia iha kurikulum akadémiku”, tenik ema númeru um iha Timor-Leste ne’e.
Ramos Horta dehan, sei fó posse ba membru governu tuir lista ne’ebe Primeiru Ministru indijitadu hato’o tanba povu hili mak hetan maiória.
“Sistema polítiku konstituisionál membru governu, Primeiru Ministru mak hili nia membru governu, se iha kazu ruma karik iha Tribunál, Primeiru Ministru rasik hatene. Ha’u la presija haree fali ida ne’e, mezmu kazu iha Tribunál ne’e, kazu Tribunál ema ne’e seidauk julgadu, seidauk kondenadu entaun prinsipiu direitu mak ne’e inosente to’o provadu”. Dehan Horta. Ana
