PM Xanana : Membru Governu Okupadu ho Orsamentu Retifikativu
Naunil Media (Díli), Primeiro Ministru (PM), José Alexandre Kay Rara Xanana Gusmão, hateten, dadaun ne’e membru Governu konstitusional da-sia okupadu tebes ho orsamentu retifikativu.
Xefe Governu konstitusional da-sia, Xanana informa asuntu ne’e ba jornalista sira hafoin enkontru seminal ho Prezidente Repúblika (PR), José Ramos Horta, iha Palásiu Prezidensiál Bairo Pité, Kinta (27/07).
Xefe órgaun ezekutivu ne’e haktuir, enkontru refere nia relata ba Prezidente Repúblika Horta kona-ba dadaun ne’e membru Governu hotu-hotu okupadu ho orsamentu retifikativu.
“Depois sei haruka mai Xefe Estadu atu promulga, informa mós ba Xefe Estadu kona-ba membru governu hotu-hotu okupadu ho orsamentu reatifikativu”, dehan eis-gerileiru komandante em xefe FALINTIL, Xanan.
Nia hateten, “hatene ona katak governu anteriór nia orsamentu ba 2023 nian iha billaun $ 2.1 ne’ebé agora atu haree husi Jullu to’o 31 Dezembru saida mak atu gasta, saida mak la gasta no mós tanba uluk ne’e ko’alia uitoan ba irregularidade. Tanba ne’e, mak IX governu konstituisionál ami informa ba Xefe Estadu haree atu revoga ka altera tiha lei sira ne’ebé governu anteriór hatama hodi muda tiha sistema ida ne’ebé uluk”.
Tuir Xanana, Estadu Repúblika Demokrátika Timor-Leste debe tebe-tebes ba mana Emilia Pires (Eis-Ministra Finansas), tanba nia mak installa sistema finansas nian ne’ebé komunidade internasionál hotu apresia.
“Hanesan ha’u temi mós povu tomak debe ba mana Emilia Pires tanba hodi nia matenek mós ajuda ita investe fundu petroleum ne’ebé agora ita investe ba hatama tan billaun $8.
Ikus Xanana, dehan informa ona ba Xefe Estadu atu kurije tiha buat sira ne’e hotu, tanba buat bo’ot ida mak katak ita bele hasai osan husi ida ne’e ba ne’eba maibé tenke ho regras, la’ós dehan halo buat hotu sem regras no saláriu de’it ita selu bens servisu. Ana
