Komisariu Faustino: PNTL Prontu Asegura Kampaña Eleisaun Prezidensiál
Naunil Média (Dili), Komandante Polísia Nasionál Timor-Leste (PNTL) Komisariu Faustino da Costa hateten Polísia prontu asegura kampaña no eleisaun prezidensiál .
“Iha enkontru ne’e mós ami ko’alia liuliu kona-bá preparasaun Komandu Polísia Nasionál Timor-Leste ninian, ba iha eleisaun no kampaña ne’ebé PNTL prontu asegura maske ami nia rekursu bele dehan katak, rekursu ida ne’ebé sai situasaun ida ne’ebé ami presiza haree hodi jere didi’ak membru sira”, dehan Komisariu Faustino da Costa ba jornalista sira hafoin enkontru ho Prezidenti Repúblika Francisco Guterres “Lú Olo” iha Palásiu Prezidensiál Nicolau Lobato Bairru Pite, Kinta (20/01/22).
KOMJER hatutan, Orsamentu ba Polísia Nasionál Timor-Leste iha tinan 2022 ne’e bo’ot, tanba ne’e PNTL sei sosa viaturas no aluga atu bele uza iha tempu kampaña no eleisaun.
“Ha’u hanoin ida ne’e situasaun ida ne’ebé ami hato’o beibeik ona PNTL iha 2022 ne’e orsamentu ida ke bo,ot, entaun inklui kompras viaturas tantu mós aluga ne’ebé ita sei uza orsamentu tinan ida ne’e, bele uza liuliu iha tempu kampaña no eleisaun ninian”, Katak nia.
Faustino hateten, Situasaun ida ne’ebé ohin sira aprezenta ba Prezidenti Repúblika, mak identifika katak iha sentru votasaun balun dala ruma difikulta asesu transporte, ne’ebé susar tanba ne’e lá’os fasil hanesan mós rede telekomunikasaun no eletrisidade, entaun sira haree hela kordena ho parte relevante oinsá para asegura no mós situasaun sira ne’e, bele iha kondisaun hodi aktividade sira hotu bele la’o di’ak.
Nia dehan, Komandu Polísia Nasionál Timor-Leste mós sei tau osan hodi aluga viaturas ba loron 60 ninian, minimu kareta hamutuk 32 atu nune’e prepara ba iha atividade kampaña no eleisaun ninian.
Iha enkontru ne’e Prezidenti Repúblika mós hato’o ba Komisariu katak, servisu tuir saida mak lei haruka no husu ba Polísia Nasionál Timor-Leste (PNTL), labele mete ba grupu artemasiais ka Partidu A ka B no kontinua servisu Polísia nian.
Jornalista *Jos
Editor Lop