CIGC Kontinua Apela Ba Komunidade Prátika Prevensaun COVID-19
Naunil Media (Díli), Sentru Integradu ba Jestaun Krize (CIGC-Sigla Português) kontinua apela ba komunidade sira atu halo prátika prevensaun ba án rasik no ba sosiedade, nu’udar meiu atu salva ka prevene-án, família no nasaun hosi kotaminasaun COVID-19.
“Ami husu nafatin ba komunidade atu kontinua fase liman bebeik, tenke mantein distánsia fíziku no sosiál liu metru ida no kontinua uza máskara obrigátoriu. Tanba estudu hatudu katak iha nasaun sira ne’ebé afetadu maka’as COVID-19, bainhira uza máskara obrigatóriu iha fatin públiku sira konsege redús ninian númeru kontaminasaun”, tenik Kordenadór ba Ekipa Estudu no Análiza Risku iha CIGC, Francisco Guterres, iha plenária Parlamentu Nasionál, Kinta (16/04).
Eis Sekretáriu Estadu Seguransa, Francisco Guterres, hatutan, uza máskara, bele prevene-an hosi COVID-19 no prevene hada’et ba ema seluk. Nune’e lori CIGC nia-naran, apela ba sidadaun hotu atu uza máskara obrigatóriu iha fatin públiku sira.
“Tanba ita haree kuandu iha ona kazu pozitivu, ita tenke buka ema sira ne’ebé halo kontaktu hodi submete ba kuarentena obrigatóriu, liu-liu família sira atu ita bele hamate korente kontamisaun COVID-19”, salienta Nia.
Tuir Kordenadór ne’e katak presiza duni rekursu ba setór saúde atu bele luta kontra COVID-19 iha Timor-Leste, tanba daudaun númeru konfirmadu kontinua sa’e nafatin no laiha sinál atu tun fila-fali.
“Ita-nia nasaun di’ak tebes tanba aplika konfinamentu obrigatóriu ne’e hanesan sira ne’ebé mai husi área afetadu tenke tama iha konfinamentu obrigatóriu no ba konfinamentu rezidénsia, maibé tenke prense rekezitu ne’ebé Ministériu Saúde iha”, nia akresenta.
Ikus liu Nia dehan, dau-daun iha parte legál kontinua haree atu forsa tarefa hanesan Forsa Defeza no Seguransa hodi bele kontinua tuir regra ka medida ne’ebé estabelese ona iha Estadu Emerjénsia.
Dau-daun ne’e tuir dadus atuál ne’ebé fó sai husi CIGC, númeru konfırmadu pozitivu COVID-19 iha Timor-Leste hamutuk 18 husi totál ne’e na’in-ida mak rekuperadu no na’in 17 mak iha hela fatin izolamentu Vera Cruz hodi hetan kuidadu intensivu. Ema ne’ebé pozitivu ona iha Timor-Leste, daudaun ne’e. konsidera hanesan kazu importadu no to’o agora seidauk konfirma kazu transmisaun lokál. Ana
