PR Horta Husu IFC Hasa’e Investimentu Estratéjiku
Naunil Media (Díli), Prezidente Repúblika (PR) José Manuel Ramos Horta husu Internationál Finance Corporation (IFC) atu hasa’e investimentu estratéjiku oinsá koopera ho setor privadu rai laran no rai li’ur.
“Prezidente Repúblika José Ramos Horta fó fiar ba IFC no nia husu IFC bele buka oinsá atu hasa’e tan investimentu iha setór estratejiku no oinsá bele mós koopera ho setór privadu husi rai liur no mós husi rai laran nian,” dehan Representante IFC iha Timor-Leste David Freedman ba Jornalista sira hafoin remata enkontru ho PR iha palásiu Prezidensiál Nicolau Lobato Bairru Pite, Tersa (21/06).
Representante IFC ne’e hatutan ekipa Internationál Finance Corporation aprezenta mós planu tinan oin nian ba Prezidente Repúblika no mós simu Xefe estadu nia hanoin oinsá bele hasa’e investimentu iha setor privadu.
“Ami ekipa kooperasaun husi International Finance Corporation mai hodi aprejenta IFC nia planu ba tinan oin mai no mós atu simu hanoin husi Xefe Estadu, planu oin mai mak ami hanoin oinsá bele hasa’e investimentu iha fatin setór privadu liu-liu setór Turizmu, Agrikultura no mós oinsá ita bele la’o nafatin projetu sira,” tenik Representante IFC
David hateten IFC nia servisu la’o hela no atinji susesu lubuk ida, no haree ba tinan rua oin mai oinsá bele aselera servisu ne’ebé la’o hela no oinsá bele haklean tan rezultadu, servisu la’o hela ne’e mak IFC parseira ho KAIBAUK Institutu Finansas, atu koopera ho sira hodi fornese servisu finanseiru ba komunidade Timor-Leste tomak, iha mós kooperasaun ho Ministériu Finansas no ajensia sira seluk kona-ba projetu, Aeroportu Dili nian, sistema saúde nian no mós projetu reabilitasaun iha Hera.
Nia dehan IFC nia modellu la’ós katak iha orsamentu ne’ebé define uluk, maibé haree ba oportunidade investimentu, entaun servisu koopera hamutuk ho kompañia sira, setór privadu no mós governu atu dezenvolve tan oportunidade atu aban bainrua IFC investimentu mós bele sa’e.
Liu husi kooperasaun ida ne’e la’ós IFC mak fornese finansiamentu ba komunidade, maibé IFC koopera ho KAIBAUK no mós fornese osan kapitál ba sira, depois sira emprestimu ba kliente sira iha nasaun tomak, no IFC nia investimentu ho KAIBAUK liu ona 4.5 milloens depois KAIBAUK nia imprestimu fó ba kliente liu ona $14 milloens.*/Jos
