MAL Apoia Umanitária Ba Estudante ETV Kalo-Heda Uatulari 16 Estajiu Iha Díli

Naunil Media (Díli), Iha Tersa (23/03) ne’e, Movimentu Asukai Lorosa’e (MAL) inisiativa apoia umanitária  urjentemente ba estudante  husi Eskola Tekniku Vokasional (ETV) Kalo-Heda  husi  postu adiministrativu Uatulari, Munisípiu Viqueque na’in 16  ne’ebé hala’o estájiu iha Díli, mosu serka sanitária konfinamentu domisiliáriu estudante sira hasoru terus ba ai-han.

Prezidente MAL Justino Sopalo Ximenes ba Naunil Media hafoin  distribuisaun umanitária ba estudante ETV Kalo-Heda, iha Kintal Boot, tersa ne’e.

“Depois ha’u rona informasaun husi ha’u-nia sekretariu MAL nian katak estudante ETV Kalo-Heda Uatulari, mai estájiu iha Díli, maibé agora dadaun sira enfrenta ba  ai-han. entaun ami foti desizaun urijente ida  para apoiu umanitária karitativa hodi apoiu nesesidade bázika ba estudante sira hodi bele auguenta iha serka sanitári konfinamentu domisiliáriu”,

Prezidenti MAL Justino hatutan, estudante ETV Kalo-Heda mai estájiu iha  empreza Millinium Grean Agro (MGA-sigla englés) sira  tama  iha serka sanitária konfinamentu domisiliáriu  sira enfrenta ba osan  no ai-han tanba estudante sira nian aman labele haruka osan sira.  

“Ha’u husu ba imi (estudante) estájiaria sira mantein kumpri regra prevensaun covid-19, uza maskara, fase limam bei-beik ho sabaun. Se karik imi laiha maskára ha’u bele oferese ba imi para uza hodi halo prevene ba moras covid-19”, tenik nia.

Nia mós husu, sidadaun sira ne’ebé mak iha kbiit naton  distribui sira ai-han  ba MAL nune’e MAL bele distribui fila fali ba estudante no komunidade sira ne’ebé enfrenta ba ai-han. MAL prontu simu apoiu husi sidadaun ne’ebé hakarak distribui, iha sá loron no sá tempu iha fatin ne’ebé de’it estrutura no membru MAL bele ba foti. Tanba apoia ne’ebé dadaun MAL hetan ne’e husi veteranus, estudante, funsionáriu no líder balun.

Iha fatin hanesan profesor orientadór José Sarmento hatutan, agradese ba MAL ne’ebé ho laran luhak bele apoiu ba estudante ETV Kalo-Heda ne’ebé hala’o estajiu Prova Aptidaun Profesionál (PAP) iha Díli ámbitu serka sanitária konfinamentu domisiliáriu .

“Iha situasaun serka sanitári konfinamentu domisiliáriu ne’e, ami estudante ne’ebé hala’o estajiu PAP iha Díli enfreta tebes iha semana hirak ne’e laiha ai-han tanba  dalan taka oinsa mak estudante sira-nia inan aman iha  Uatulari bele haruka osan no ai-han mai Díli. Sorte boot ohin MAL apoia ona nesesidade ba ami-nia estudante  nain-16”,  José akresenta.

Apoiu umanitária karitativa  nesesidade bázika ne’ebé MAL distribui ba estudante sira mak hanesan foos, mana, rinso no sedap. Pau/Vit