Kompañia Salimago Haklot Ponte Sei Fó Impaktu Ba Komunidade Iha Aldeia Moris Ba Dame
Naunil Media (Díli), Komunidade Mario da Concieção informa, kompañia Salimago haklot Ponte, bainhira bee volume bo’ot sei fó impaktu ba komunidade sira husi aldeia Moris ba Dame, Suku Bairru Pité, Postu Administrativu Dom Aleixu.
Preokupasaun ne’e Komunidade husi Aldeia Moris ba Dame Mario da Coceção ba Naunil Media, iha Ponte aldeia Moris ba Dame, domingu (11/04).
“Governu ho komañia nian serbisu ne’e hatán ona komunidade sira-nia preokupasaun, maibé ba ami komunidade parte karik sei fó perigu nafatin ba ami tanba ponte ne’e kompañia sira uza manila bee nian ne’ebé ki’ik liu. Ida ne’e mota aban bain-rua mota tun sei sobu komunidade sira nian hela fatin hotu”, dehan Mario.
Tanba ne’e nia dehan, Manila ne’ebé kompañia uza ba ponte nian luan metru 1 no manila nia todan kilograma (kg) 20 bainhira bee ho volume ne’ebé boot sei tama ba komunidade sira nian uma tanba ne’e komunidade sira rezeita totál kompañia Salimago nian serbisu.
“Horseik mak kompañia sira mai haree fatin no foti kedas desizaun, maibé laserve tanba manila ki’ik, ita hatene risku bainhira mosu inundasaun. Kompañia tenke kria seguru ba komunidade sira”. Tenik nia.
Iha fatin hanesan xefe suku Bairru Pité João B. da C. Belo husu, governu tenke hadia ponte hodi uza ba tempu naruk tanba foin lalais loron 04 Abríl 2021 mosu dezastre naturál xefe governu mai haree rasik ponte ne’e.
“Husi dezastre naturál foin lalais ne’e Primeiru Ministru no Ministru Obras Públiku (MOP) haree tanba ne’e mak atu hadia, maibé ladun seguru ba komunidade sira”.
To’o notísia ne’e tun Naunil Media seidauk komfirma parte komapañia Salimago LDA, ne’ebé responsabel reabilitasaun Ponte iha aldeia Moris ba Dame, suku Bairru Pite. Rit/ Ivo
