Xanana Impede Mate Isin, PM Taur: Ekipa Mediku Kontinua Serbisu La Bele Tauk Presaun

Naunil Media (Díli), Relasiona eis Prezidente Repúblika Kay Rala Xanana Gusmão impede mate isin Armindo Borges,  Primeiru-Ministru, (PM), Taur Matan Ruak enkoraja ekipa médiku liña frente firma   hodi kontinua serbisu, lalika ta’uk ba presaun sira ne’e tanba governu no estadu sei iha.

Primeiru-Ministru, Taur Matan Ruak haktuir  akompaña hela situasaun iha Sala Izolamentu ba kazu pozitivu COVID-19 iha Vera Cruz, relasiona ho pasiente pozitivu COVID-19 ne’ebé hakotu iis hodi kalan, ne’ebé ohin dader, eis Prezidente Repúblika, hanesan mós eis Primeiru-Ministru, Xanana Gusmão ba hala’o impedementu, hodi Governu labele lori ba haloot tuir protokolu saúde nian iha semitériu própriu COVID-19 nian iha Metinaru.

Ho situasaun ida ne’e PM Taur hateten, daudaun ne’e hamosu ema nia sentimentu negativu ba profisionál saúde sira, ema balun hahú reazen tuda ambulánsia sira no la fiar médiku sira. Ba situasaun ida ne’e, Xefe Governu enkoraja médiku sira no ekipa liña frente hotu atu kontinua firme serbisu, keta triste no lakon esperansa, tanba Governu no Estadu iha hela ita-boot sira nia sorin.

“Ha’u lamenta ho situasaun ohin iha Vera Cruz, devia ser ida ne’e la podia akontese.  Ha’u rona, ema balun komesa tuda ambulánsia no ita nia ekipa liña frente sira, atitude ne’e sei la ajuda atu kombate moras ne’e iha ita- nia rain”, Xefe Ezekutivu ne’e  informa.

“Hanesan Primeiru-Ministru, hakarak manifesta ha’u-nia solidariedade no apoiu tomak ba profisionál saúde no ekipa sira hotu iha liña frente iha Sala Situasaun, korajen no kontinua serbisu, ita-boot sira sei la mesak, Governu no Estadu tomak iha ita-boot sira nia kotuk”, Tenik Taur. Pau