Posko Emerjénsia JIHK Apoiu Ai-Han Ba Uma Kain 50 Iha Atauro
Naunil Media (Atauro), Sábadu (16/05) ne’e, Juventude Intelektual Hadomi Karidade (JIHK) fó apoiu ai-han ba povu kbiít laek hamutuk uma kain lima nolu (50) iha hosi Postu Admistrativu Atauro Munisípiu Díli.
Uma kain 50 ne’e kompostu hosi Suku rua, hosi Suku Vila-Maumeta uma kain 20 no 30 hosi Suku Makili. Enkuantu Ai-Han sira mak hanesan Fos, Supermi, Mina, no seluk tan.
Kordenadór (JIHK), Nino Perreira, hateten aktividade asaun karidade ne’e hanesan kontinuasaun ne’ebe antes ne’e JIHK hala’o tiha ona ba povu kibit laek sira ne’ebe durante estadu emerjénsia menus ai-han.
“Ami observa no rona mos informasaun ne’ebe mai hosi ita nia ekipa sira ne’ebe iha fatin ida ne’e, husu posko emerjénsia mos mai to’o iha postu Atauro. Ami kordena ho xefe suku no xefe aldeia, identifika duni iha suku rua nomos aldeia rua ou tolu hanesan ne’e mak afetadu krize ai-han, tamba ne’e mak ami hola inisiativa to’o iha ne’e”, informa Kordenadór JIHK, Nino Perreira ba jornalista sira iha suku Vila-Maumeta, Atauro.
Nia hatutan, apoiu sira ne’e hanesan domin núdar humanu hodi haburas espiritu solidariedade ba malu iha situasaun defisil.
“Buat inportante ne’ebe mak ita dehan ne’e mak ita kontinua nafatin hamoris ka haburas dezenvolvimentu espiritu solidariedade, hatudu domin ba malu, hametin nafatin ita nia unidade nasional, para moris duni sosiedade ne’ebe mak hatene respeita malu, hatene hakiak ita nia esperansa, dehan katak ita nafatin optimista situasaun ne’ebe ohin loron ita hasoru hela, tantu inpase polítiku ou situasaun ameasa hosi virus corona ida ne’e” tenik Nino Perreira.
Xefe suku Vila-Maumeta, Filipe Ximenes, agradese ba ekipa JIHK, tamba bele to’o ba sira nia komunidade nia leét, bele responde komunidade nia halerik, ai-han maske oituan ka barak, maibe bele responde defikuldade komunidade sira nian.
“Ami agradese tamba maun Nino Perreira nia ekipa prezensa ne’ebe mak fó ona sira nia domin mai ami nia povu kbiít laek sira mak kuran duni aihan”, informa autoridade suku Vila-Maumeta, Filipe Ximenes.
Tuir planu posko emerjénsia ne’e sei termina nia servisu hanesan solidariedade ba ema kibiít laek sira, hafoin estadu emerjénsia remata tamba posko ne’e ejiste iha estadu emerjénsia hodi responde ba komunidade sira nia halerik ba ai-han.
Durante ne’e, JIHK apoiu ona uma kain kuaze rihun resin iha kapital Díli inklui iha Atauro. Uar
