CNRT Konsidera FRETILIN, PLP no KHUNTO Aproveita EE Hodi Asaltu Poder
Naunil Media (Díli), Deputadu Bankada CNRT, Marcos Xavier, hateten bankada Fretilin, PLP no Khunto aproveita iha Estadu Emerjénsia (EE) hodi asalta poder.
Deputadu bankada CNRT, Marcos Xavier, ba jornalista sira liuhosi komunikadu imprensa iha bankada CNRT, Parlamentu Nasionál (PN), Kuarta (27/05).
“Bankada Fretilin hamutuk ho PLP no KHUNTO, aproveita EE hodi halo asaltu poder no harahun koligasaun ne’ebé halo ona esforsu formal hotu-hotu tuir orientasaun Prezidente Repúblika nian. Maske ikus mai Prezidente Repúblika fó deit resposta ba grupu Golpista sira hodi dekreta orgánika Governu foun iha ámbitu VIII Governu nian. Loloós VIII Governu monu tiha ona, agora governu foun tenke hanaran IX Governu no partidu koligasaun foun ba governu foun ne’e tenke halo konferénsia hodi aprova forma koligasaun foun ba IX Governu”, hateten deputadu Marcos.
Reprezentante povu iha Parlamentu Nasionál ne’e esplika,”Estadu Emerjénsia sai de’it instrumentu polítiku hodi hametin ganânsia ba poder, tanba ne’e mak bankada CNRT ho nia aliadu sira la partisipa iha plenária ne’ebé prezide hosi Prezidenti Parlamentu Nasional ilegal, Aniceito Guterres.
Deputadu ne’e afirma, governu labele halo promesa falsu ba povu no tenke fó livre ba komunidade sira iha área doók hosi COVID-19, bele halo nia knaar hanesan bai-bain hodi sustenta ba família uma laran.
“Bancada CNRT ho nia-aliadu, ami husu atu Governu labele toman ho promesa ba povu hodi hein deit subsídiu U$10.00, husik munisípiu sira ne’ebé livre husi COVID-19 kontinua halo produsaun, halo to’os no natar hodi bele sustenta ba família no buka moris. Governu bele halo medidas exepsionais ba fatin balun hodi implementa EE, por ezemplu Covalima, Bobonaro, RAEOA no Díli bele kontinua ho medidas emerjensia to’o mundu livre hosi corona virus”. dehan Marcos. Uar
