PM Taur Dada Fila-Fali Pedidu Demisaun Iha PR Lú Olo
Naunil Media (Díli), Primeiru Ministru (PM), Taur Matan Ruak da fila-fali karta pedidu demisaun iha Prezidente Repúblika (PR) Francisco Guterres ‘Lú Olo’, tanba atu salva povu Timor-Leste hosi surtu COVID-19.
Antes, iha Tersa loron 22 fulan Fevereiru tinan ne’e, atuál xefe governu konstitusionál da-ualu, Taur Matan Ruak, diretamente submete pedidu demisaun ba Prezidente Repúblika hafoin Orsamentu Jerál Estadu (OJE) tinan 2020 xumba iha Parlamentu nasionál (PN).
“Ohin Ha’u retira fila-fali ona, ha’u nia aprezentasaun pedidu demisaun iha Prezidente da Repúblika (PR)”, PM, Taur Matan Ruak ba jornalista sira hafoin sorumutuk semanál ho Xefe Estadu Timor-Leste, Francisco Guterres ‘Lú Olo’, iha Palásiu Presidensiál, Bairro Pité, Kuarta (08/04).
Xefe governu Taur hateten, retira karta demisaun ne’e tanba haree ba situasaun agora presiza ema hotu nia kontribuisaun.
“Ha’u sente katak momentu hanesan ne’e nasaun presiza ita hotu nia kontribuisaun liuliu ha’u-nia kargu Primeiru Ministru, tenke fó presatasaun bo’ot ba ita nian nasaun”, klarifika Taur.
Nia haktuir, Prezidente Republika rona no atensaun nafatin, fó apoiu ba Primeiru Ministru, governu atu esforsu servisu maka’ás hodi prevene COVID-19 iha Timor-Leste.
Nune’e pedidu demisaun ne’ebé PM Taur Matan Ruak submete ba ba PR, maibé la iha resposta ruma hosi xefe estadu Timor-Leste Lú Olo ba PM. Ho situsaun ne’ebé mak ohin loron nasaun hasoru moras surtu COVID-19, PM Taur dada fila-fila pedidu demisaun hodi lidera nafatin governu konstitusionál da-ualu luta kontra COVID-19 hodi salva povu Timor-Leste. Dms
