Aban, PR Reúne ho KSDS no KE Ko’alia Estadu Emerjénsia

Aban Tersa (24/03), Prezidente Repúblika (PR) sei konvoka reuniaun ho karáter urjénsia ho membrus hotu-hotu ne’ebé halo parte Konsellu  Superiór Defeza no Seguransa (KSDS) no Konsellu Estadu (KE) bazeia ba pedidu hosi Governu iha Segunda (23/03) atu deklara Estadu Emerjénsia tanba haree ba moras foun hosi corona virus ne’ebé da’et lalais hosi ema ba ema iha mundu tomak no halo ema barak moras no mate ona.

Prezidente Repúblika, Francisco Guterres Lú Olo, mak sei prezide reuniaun Konsellu Superior Defeza no Seguransa no Konsellu Estadu hodi rona membru sira-nia hanoin  kona-ba pedidu hosi Governu atu deklara Estadu Emerjénsia.

Reuniaun Konsellu Superiór Defeza no Seguransa  nian sei hahú tuku 9 dadersan no  Konsellu Estadu  sei hahú tuku 11.

Estadu Emerjénsia signifika katak sei iha medidas ne’ebé sei limita ka supende direitu balun liberdade balun no garantias balun ne’ebé Konstituisaun fó ba sidadaun sira. Governu hanoin katak ho medidas sira ne’e mak ita bele kombate no hamenus moras ne’e da’et hosi ema ba ema, iha Timor-Leste.

Governu propoin ona períodu fulan ida ba  Estadu Emerjénsia.

Hafoin rona ona opiniaun husi  membrus Konsellu Superior Defeza no Seguransa no Konsellu Estadu no haree katak presiza halo duni Deklarasaun Estadu Emejénsia,   Prezidente Repúblika sei husu autorizasaun hosi Parlamentu Nasionál, liuhosi  Mensájen ida. Karik Parlamentu Nasional aprova, Prezidente Rpúblika sei deklara Estadu Emerjénsia liuhosi  Dekretu Prezidensiál.

Ohin, 23 marsu, molok tuku ida, mak Prezidente Repúblika simu pedidu  hosi Governu  atu halo Deklarasaun Estadu Emerjénsia.

Prezidente Repúblika,  iha ninia mensajen ba povu tomak,  iha 20 marsu, tuku tolu lokraik,  husu ba instituisaun hotu-hotu Estadu nian no sosiedade tomak atu fó liman ba malu atu prevene no kontrola moras husi corona virus.

Timor-Leste, liuhosi Ministra Saúde, deklara ona katak iha ema na’in-ida ne’ebé hetan ona moras hosi Corona virus.

Membru Konsellu Superior Defeza no Seguransa ne’ebé sei partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negósiu Estranjeiru no Kooperasaun Dionísio Babo, Ministru Defeza no Seguransa Filomeno Paixão,  Ministru Justisa Manuel Carceres, hosi Parlamentu Nasionál, Aderito Hugo da Costa, David Dias Ximenes, Abel Pires da Silva, Xefe Estadu Maiór Jenerál F-FDTL, Maijór Jenerál Lere Anan Timur, Komisáriu PNTL Faustino da Costa, Diretór Jerál Servisu Intelijénsia Manuel Serrano, José Manuel Fernandes ‘Nakfilak’, Cristina da Silva no sei konvida Eis Primeiru Ministru no Ministru Saúde Rui Araújo no Infectologista Danina Coelho no Diretór Ezekutivu FONGTIL Daniel Santos.

Membru Konsellu Estadu ne’ebé sei partisipa iha reuniaun ne’e mak Prezidente Repúblika Francisco Guterres Lú Olo, Primeiru Ministru Taur Matan Ruak, Eis Prezidente Repúblika sira,  Prezidente Parlamentu Nasionál Arão Noe, no membru ne’ebé nomea hosi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea hosi Parlamentu Nasionál: Eduardo de Deus Dusae’, Aurora Ximenes,  José Cornelio Guterres, Árcangelo de Jesus Gouveia Leite, José dos Santos ‘Naimori Bucar’. Mídia PR.