Toma Posse PR Horta : Xanana Tuur iha Kotuk, Deskonfia KO La fó Konvite
Naunil Media (Díli), Deputadu Bankada FRETILIN, Dario Madeira, preokupa ho líder Nasionál Kay Rala Xanana Gusmão tur iha kotuk (la tur iha fatin VIP), iha ambitu seremonia toma posse Prezidente Repúblika (PR), José Ramos Horta, iha Tasi-Tolu, Kinta 19/05.
Kona-ba líder Nasionál Kay Rala Xanana Gusmão tur iha kotuk, reprezentante iha uma fukun Parlamentu Nasionál (PN), Deputadu Dario, deskonfia komisaun organizadora (KO) la fó konvite, no husu atu halo investigasaun.
“Iha serimonia ba toma posse PR foun, publiku nafatin preokupa inklui pesoalmente mos preokupa ba asuntu ida ne’e. Husu ba komisaun organijadora ba preparasaun serimonia toma posse, esplika ida ne’e ba publiku tomak, atu publiku esklaresidu kona-ba Kay Rala Xanana Gusmão”, intervensaun polítika, Deputadu Dario Madeira, liu husi plenaria iha PN, Tersa (24/05).
Nia hatutan, media sosial mos rame loos toka kona-ba líder nasional ida hanesan Xanana, komisaun organizadora fó konvite ka lae, tanba momentu serimonia la’o nia ba de’it iha serimonia liur.
“Hau rasik husu Prezidente Komisaun Organizadora, mak toma konta ba iha serimonia tenke esklarese”, afirma deputadu FRETILIN ne’e.
Tuir nia, karik komisaun organizadora la fó konvite, ne’e núdar aktu erro bo’ot ida, hasoru líder nasionál hanesan Xanana.
“Tanba ne’e halo moe estadu, líder bo’ot ida hanesan Xanana Gusmão, ita la konvida, nia ba akompaña fali husi liur deit, ne’e halo moe estadu no halo moe veteranu sira”, tenik nia.
Iha sorin seluk, Deputadu Bankada PD, Adriano do Nasimento, hateten kuandu halo serimonia bo’ot preija hadiak kestaun protokoler, nunee líder istoriku sira no eis-titulares hotu-hotu hetan konvite.
Enretantu Sekretariu Estadu no Komunikasaun Sosial, Juvinal Mericio Acara, dehan “liga ba konvite selebrasaun 20 Maiu liu-liu komisaun organijadora fó konvite ba ita nia maun Xanana. Hau iha komunikasaun ho Vise-Ministru Estatal ho komisaun organizadora, informa konvite ba hotu mais ne’e depende ba idak-idak atu deside atu ba ka la ba”, esplika membru Governu konstitusionál da-ualu, Merício Akara.
“Konvite ba sira hotu, inklui maun Xanana, komisaun organizadora lori konvite ba”, tenik nia. Ana
