CEFOBOM Fó Kapasitasaun Hakiak Ikan Ba Grupu Tarzetu, Hasa’e Ekonómia Família
Naunil Media (Manufahi), Sentru Foin Sa’e Don Boaventura Manufahi (CEFOBOM) serbisu hamutuk Caritas Australia Timor-Leste (CALT) fó kapasitasaun tekniku hakiak ikan nian ba grupu Tarzetu foun hodi hasa’e ekonómia família nian.
Reprezentante Diretór CEFOBOM Carmo Da Costa hateten, CEFOBOM no CALT realiza progama kapasitasaun ne’e tanba populasaun iha aldeia Danita maiória gosta hakiak ikan no populasaun barak gosta han ikan.
Reprezentante diretór CEFOBOM Carmo da Costa ba Jornalista sira hafoin abertura formasaun tekniku hakiak loron rua ba grupu Tarzetu, iha aldeia Datina, suku Holarua postu Administrativu same, segunda (12/04).
“Ami kontinua fasilita populasaun oinsa mak bele produs ikan ne’e sai barak liu, hodi ba faan iha merkadu no ba eskola hodi responde merendu eskolár ne’ebé mak governu realiza, ho kreativu hirak ne’e bele ajuda fila-fali rendimentu ekonómia famíliar nian”, dehan Carmo
Diretór CEFOBOM Carmo hatutan, programa kapasitasaun servisu hamutuk ho parseiru ka organizasaun sira, husi meius sira ne’e atu hasa’e produsaun ikan ho kualidade diak, maibé depende fila fali ba konsiénsia husi komunidade sira nian.
“Dala barak ita gosta konsumu de’it ikan ne’ebé mak mai husi tasi no husi rai liur, maibé ita rasik riku ho bee, presiza kria ita nian rasik husi hakiak ikan atu nune’e bele hamenus gastu sosa no bele aumenta rendimentu ekonómia família nian”. Tenik Carmo.
Iha fatin hanesan xefe suku Holarua, João Corte-Real husu, agradese CEFOBOM ho ninia estrutura ne’ebé mak ho hanoin di’ak hodi enkoraja komunidade sira liu hosi dalan ida hakiak ikan hanesan meius ida bele hamenus gastu ba hola ikan ne’ebé mai husi rai liur.
“Programa hakiak ikan foin mak implementa iha aldeia Datina, buat sira ne’e la’ós buat foun ida ba ita, maibé husu komunidade sira se bainhira implementa ona tenke ser Kuidadu ho didiak”. Tenik João. NFM