PR “Lú Olo” Dekreta Estadu Emerjénsia Ba Dala XIV

Naunil Media (Díli), Prezidenti Repúblika (PR) Francisco Guterres “Lú Olo”  liu husi Dekretu Prezidenti  Repúblika númeru 35/2021 iha 28 Maiu 2021, dekreta Estadu Emerjénsia dala sanulu resin-haat ba loron loron tolu-nulu (30), hahú husi tuku 00.00 iha 2 juñu 2021 to’o loron  kuarta no termina iha tuku 23.59 iha 1 jullu 2021 to’o loron kinta.
Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.

“Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál. Molok ne’e, Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál estensaun Estadu Emerjénsia ba dala-14”.liu husi Komunikadu ne’ebé NAUNIL média asesu husi media PR, kuarta (02/06).

Iha Timor-Leste kazu konfirmadu ho Covid-19 ho númeru akumuladu hamutuk 7161 desde marsu 2020, kazu ativu 2630 no rejista mate na’in-16. Haree ba númeru kazu Covid-19 ne’ebé aumenta husi loron ba loron, Estadu kontinua foti medidas prevensaun no kombate kontájiu virus SAR-CoV-2, Deklarasaun estadu emerjénsia sei abranje territóriu nasionál tomak.

Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fizasaun rezidénsia, direitu reuniaun no manifestasoins, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada.

Autoridades públikas kompetentes sei impoin medidas importante hodi prevene importasaun estirpes foun SARS-CoV-2 ba territóriu nasionál no permite kontensaun no nia alastramentu entre populasaun liuhusi dalan taka fronteiras, bandu estranjeiru sira mai territóriu nasionál, estabelesimentu regras distansiamentu sosiál, impozisaun ba obrigasaun halo teste, izolamentu ba pasiente infetadu, konfinamentu domisiliáriu no determinasaun serkas sanitárias.

Desde fulan Marsu 2020, hafoin rejista kazu konfirmadu ida ho SARS CoV-2 Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hases sidadaun hotu-hotu husi kalamidade públika ne’ebé bele mosu husi moras Covid-19.*Jos