FEATUREDJustisa

Governu Tenke Kontrola Alfaiate Inventa Kór Bandeira RDTL

Fahe Tutan

Naunil Media (Liquiçá), Povu husi Munisípiu Liquiçá husu ba governu atu kontrola alfaiate sira, tanba deskonfia iha alfaiate balun inventa kór bandeira Repúblika Demokrátika Timor-Leste (RDTL).

Liquçá oan sira hato’o kestaun ne’e durante dialógu ho deputadu sira mak hala’o iha Salaun Paroquial Psotu Administrativu Maubara, Sábadu (22/02/2020).

“Alfaiate balun suku Bandeira Nasionál Repúblika Demokrátika Timor-Leste tuir ninia gostu mak barak, inventa kór bandeira. Ami husu ba governu nasionál kolabora ho autoridade munisipal nian tun to’o autoridade aldeia atu halo kontrolu ba kestaun ida ne’e, tanba ema ida labele inventa kór bandeira tuir ninia hakarak”, hateten abitante, Alcino Freitas da Cruz .

Nia esplika, tuir Konstituisaun Repúblika Demokrátika Timor-Leste (KDRTL) artigu 15, alinea 2 defini kór ona bandeira nasionál mak kompostu husi kinur, mean, metan no mutin iha fitun no bandu ba ema se deit labele muda kór bandeira tuir ninia hakarak.

Hatan ba preokupasaun ne’e Deputada Parlamentu Nasionál Elvina Sousa, husu ema hotu atu hato’o keixa ba autoridade lokál bainhira haree ema ruma fa’an bandeira nasionál la tuir kór lolós ne’ebé hatúr iha KRDTL.

“Hau hakarak atu hato’o ba estudante sira ho autoridade lokál no sidadaun hotu atu bele halo keixa ba polisia, bainhira haree ema balun dada bandeira RDTL la tuir kór ne’ebe aprovadu tuir konstituisaun RDTL nian” hateten deputada husi bankada Partidu Demokratiku ne’e.

Programa diálogu rona povu nia lian ne’e organiza Institutu Republikana Internasional (IRI) no apoiu hosi Ajensia Estadus Unidus ba Dezenvolvimentu Internasionál (USAID-Sigla Inglesh), iha ne’ebe hala’o dala rua iha tinan ida.

Programa ne’e hetan prezensa direitamente husi deputadu/a sira husi bankada hotu iha parlamentu nasionál hakbesik liu ba komunidade.

Durante diálogu, komunidade sira hato’o preokupasaun kona-ba problema estrada, bee moos no saúde. Ana

Leave a Reply

Your email address will not be published. Required fields are marked *