Suku Vatuboro Afeitadu Bailoron Naruk, Agrikultór Husu MAP Fó Atensaun
Naunil Mdeia (Díli), Xefe Suku Vatuboro, Julito dos Santos, hateten suku ne’ebé nia lidera dadaun afeitadu bailoron naruk, nune’e husu ba Ministériu Agrikultura no Peskas (MAP-Sigla Português) atu fó atensaun tanba ai-han (batar) ne’ebe agrikultór sira mate hotu.
Julito dos Santos hato’o preokupasaun ne’e ba Naunil Media hafoin partisipa ‘Programa Rona Povu’ ne’ebe organiza hosi Institutu Repúblika Internasionál (IRI) mak hala’o iha Salaun Paroquial Postu Administrativu Maubara, Sábadu (22/02/2020).
“Hanesan autoridade lokál nia observasaun iha terenu, komunidade barak mak infrenta ba tempu bai loron naruk ida ne’e. Nu’udar representante povu hato’o hela kestaun sira ne’e ba ministeiru relevante hodi toma responsabilidade ba komunidade sira ne’ebé infrenta hela bai loron naruk ida ne’e, tanba batar ne’ebé mak ita nia komunidade sira kuda labele fó benefisiu di’ak”, hateten Julito dos Santos.
To’os Na’in José de Oliveira bailoron naruk ne’e afeita ba ema hotu tanba batar ne’ebe kuda ona labele hetan ninia produsaun di’ak.
“Ministériu ne’ebe kompetente mak bele tun direita mai terenu hodi observa ba situasaun mudansa klimatika ida ne’e, oinsa mak bele hetan prevensaun ba mudansa klimatika. Tenke halo sosializasaun ba ita nia komunidade sira labele estraga ita nia natureza, kuandu ita estraga mak tenke mosu bai loron naruk”, dehan José de Oliveira.
Suku Vatoboro iha aldeia limak hanesan, aldeia Vaupu, Sabulau, Kaibair, Raiglelu no Tatamalobu ho nia total populasaun 2748.
