Lere Apela Veteranu Sira Hakmatek

Fahe Tutan

Naunil Media (Díli), Xefe Estadu Maior Jenerál FALINTIL Forsa Defeza Timor-Leste (F-FDTL-Sigla Português), Maijor Jenerál Lere Anan Timur, hateten ho situasaun impase polítika rai laran, veteranu sira tenke ko’alia ba malu no tuur hakmatek.

Xefe Estadu Maior Jenerál F-FDTL, Maijor Jenerál Lere Anan Timur deklara asuntu ne’e iha Centro Convenções Díli (CCD), Segunda (02/03).  

“Husu atu veteranus sira ko’alia ba malu no tuur hakmatek relasiona ho situasaun polítika ne’ebé dadaun  ne’e akontese”, apela Jenerál Lere Anan Timur.

Eis gerileiru Komandante Rejiaun Ponta Leste, relasa líder nasionál sira la marka prezensa iha semináriu nasionál ba komemorasaun loron veteranus tanba peokupa ho situasaun polítika rai laran.

“Ita komprende situasaun polítika agora ne’e, sira (líder nasionál) iha peokupasaun bo’ot. Oinsa mak situasaun ne’e la’o hakmatek”, dehan veteranu Lere Anan Timur.

Nia husu ba líder nasionál sira hanesan, Kay Rala Xanana Gusmão, Marí Alkatiri, Ramos Horta tenke iha konxíensia hodi hamutuk hakotu lalais impase polítika rai laran.

Iha sorin seluk, Sekretáriu Estadu ba Asuntu Kombatente Libertasaun Nasionál, Gil Da Costa Monteiro ‘Oan Soru’, liu husi nia intervensaun, hateten triste tanba na’in ba istória sira hanesan Kay Rala Xanana Gusmão, Mari Alkatiri, José Ramos Horta la marka prezensa, maske komisaun organizadora hato’o ona karta konvite. Leo

Leave a Reply

Your email address will not be published.