PN Ejiji Governu Harii Lalais Fatin Izolamentu Ba Corona Virus

Fahe Tutan

Naunial Media (Díli), Parlamentu Nasionál (PN) ejiji ba oitavu governu konstitusionál liu husi Ministériu Saúde (MS) atu urjentemente harii fatin ba izolamentu corona virus, tanba dadaun ne’e deskonfia italiano ida iha Timor-Leste kona virus refere.

Ejijensia ne’e deputadu/a sira foti durante sesaun plenária iha uma fukun Parlamentu Nasionál, Segunda (09/03).

Xefe Komisaun F Parlamentu Nasionál ba asuntu saúde, seguransa sosiál no igualidade, Deputada Maria Barreto, husu liñaministeriais mak tama iha komisaun prevensaun corona virus atu hamutuk ho minist’eriu saúde, urjentemente estabelese fatin Izolamentu no mos Karaentina.

“Husu ba iha liñaministeriais ne’ebé mak tama iha komisaun ida ne’e, atu esforsu an hodi apoiu no halo koordensaun ne’ebe mak forte nune’e estabelese lalais fatin izolamentu no mos karaentina iha rai laran, nune’e karik bele halo kontrola ho fasil ba sidadaun ne’ebe deskonfia kona corona virus”, hateten deputada ne’e.

Deputada Maria Barreto dehan, nia preokupa tanba daudaun ne’e deskonfia sidadaun Italiano  iha Timor-Leste kona corona virus.

Deputadu Francisco de Vasconselho, hateten nia dúvida ho papél Ministériu Estatal tanba ladauk iha desizaun definitiva harii fatin izolamentu ba corona virus.

“Iha polítika ida halo antisipasaun virus korona ne’e ita bele halo izolamentu . Virus ne’e lori ba Atauro, governu foin koalia planu deit. Hau haree televisaun adminstrasaun munisipiu, adminstarsaun postu halo deklarsaun, pois muda fali ba Metinaru, xefe suku sira halo deklrasaun ba fali Tibar, Ministériu Estatal nian papél ne’e oinsa !”, hateten deputadu husi bankada PLP ne’e.

Agora dau-dauk masker Dili laran ema hasae nia folin sae boot tebe-tebes.Virus korona ne’e,prekupa ema hotu nian.  

Tuir obeservasaun jornalista, ho preokupasaun corona virus ne’ebe dadaun ne’e sai virál iha mundu tomak inklui mos Timor-Leste, negosiante rai laran hahu hasa’e presu maskra ho U$ 1.00, iha ne’ebé antes ne’e ho presu U$ 0,25 sentavus.

Sesaun plenária loron dahuluk semana ne’e, prezente husi reprezentante oitavu governu konstitusionál, atual Sekretáriu Estadu ba Komunikasaun Sosál (SEKOMS) Maricio Juvenal dos Reis ‘Akara’ hodi hatan ba deputadu/a  sira nian preokupasaun.

Nune’e Sekretáriu Estadu ba Komunikasaun Sosál (SEKOMS) Maricio Juvenal dos Reis ‘Akara’, promete sei enkamina prekupasaun ba ministériu relevantes atu tau atensaun. Ana

Leave a Reply

Your email address will not be published.