Rai Lafaek Lakon Tan “Manu Bure,” Max Sthal

Naunil Média (Díli), Ami lian la’ek, Dadeer-san foin hadeer, Loron matan foin haksumik-a’an, Husi kristu-rei-nia kaba’as,Teti-teki anin-maus hato’o lia-menon “Manu Bure” Max Stahl husik hela ona mundu ne’e.

Ami ain liman mamar, laran taridu, matan been turuk, basá ami lakon “Manu Bure” Rai lafa’ek nian ida tan,.

Bainhira rai boot sira taka matan, nega ami susar no terus, Ó fanun no tuku sira nia fuan tatoli ami luta ba mundu tomak.

Maske ami halerik ba ó nia “mate,” Ami fi’ar katak, Loriku sala la’ek sira be ó grava sira nia ilas tinan tolu nolu kotuk ba, Sei nahe “KARPET,” sei bidu no tebe, sei hananu aleluia, sei tara tais ba ó Vivi…..viva Timor-Leste.

Ruin sira be sei naklekar, iha tasi okos, iha foho lolon, iha rai hefan, iha ai-laran, sei halibur a’an, hodi tebe likurai, hasoru sira nia belun bo’ot.

Ohin ami kari’i ai-funan ne’e, sunu lilin ne’e iha Rate Santa Cruz, Fatin Lulik, wainhira ó homan mehi hamutuk ho ami.

Ita sei hasoru malu fali iha biban seluk, iha fatin hanesan, hodi hanoin hikas ita nia ain-leut hamutuk sira, Viva “ Manu Bure” Max Sthal.

Dadolin Murak, Sikun Farol, Dadeer-san, 28/10/21.

Asua’in Rohan La’ek, Dadolin Murak                                 

.

Imi nia isin no ruin, sai ai-rin ba nasaun, imi nia kosar no ran fó iis (Ispiritu), no matenek mai ami, imi nia moris no mate, sai mata-dalan, mai mai nia moris ohin loron-aban.

Imi kari’i no kuda hela ona fini ba Liberdade, no moris di’ak nian iha ami neon.

Iha ai-hun no fatuk lulik, iha uma lisan ami halibur malu, hodi promete atu haburas no habelar, fini sira ne’e fó nafatin matak-malirin mai ami, atu ami banati tuir fitun-mutin be imi hatudu hela-ona mai ami, atu ami bele hatutan imi nia mehi. Remata

KALAN BO’OT,RAMELAU-HUN. IHA BIBAN IDA. DADOLIN MURAK.