PR Lú Olo Ho PM Taur Kuda Ai-Parapa Iha Tasi Ibun Metinaro
Naunil Media (Díli), Iha Sexta (13/03) ne’e, Prezidente Repúblika (PR) Francisco Guterres ‘Lú Olo’ ho Primeiru Ministru (PM) Taur Matan Ruak no akompaña husi membru oitavu governu partisipa kuda ai-parapa hamutuk hun rihun sanulu resin tolu (13.000) hodi prezerva natureza iha área tasi ibun, Suku Sabuli, Postu Administrativu Metinaro, Munisípiu Díli.
Abertura kampaña nasionál kuda ai-oan ho tema ‘sidadaun ida kuda ai-oan ida’ iha tasi ibun Metinaro nian ne’e, simbolikamente Xefe Estadu Timor-Leste Lú Olo entrega Ai-Parada oan ba Prezidente Autoridade Munisípiu Díli Gaspar Soares no kontinua entrega tutan ba Administradór Postu Administrativu Metinaro.
Hafoin entrega ai-oan, Simbolu Unidade Nasionál Francisco Guterres Lú Olo akompña husi nia espoza Cidalia Lopes Nobre Mozinho Guterres, hamutuk ho ho PM Taur Matan Ruak ho nia espoza, Prezidente Tribunal Rekursu (PTR) Deolindo do Santos ho espoza, membru parlamentu nasionál, membru oitavu governu, Xefe Estadu Maiór Jenerál F-FDTL, Maijór Jenerál Lere Anan Timur, Komadante Jerál Polísia Nasionál Timor-Leste (PNTL), Komisáriu Faustino da Costa hamutuk ho komunidade no estudante sira kontinua hakat ba fatin destinadu hodi kuda ai-parapa.
Molok tau ai-parapa oan ba rai kuak ho kontente no oin midar, PR Lú Olo hateten, sidadaun ida tenke kuda netik ai-oan ida atu haburas fila fali no prezerva tasi ibun, nune’e husu ba komunidade sira iha Metinaro tenke tau matan ba ai sira ne’e.
“Ita kuda ai-parapa oan ne’e hodi preserva area tasi ibun ida ne’e, sidadaun ida tenke kuda netik ai-oan ida para haburas fila fali tasi ibun ida ne’e, komunidade sira iha Metinaro tenke tau matan ba ai sira ne’e”, hateten Prezidente Repúblika, Lú Olo.
Benifisiu husi ai-parapa ne’e, sei fó kontribui ba elementu importante iha eko-sistema hodi mantein estabilidade natureza no minimiza aborasi ka estragu husi laloran tasi, satan netik akontese tasi sa’e (sunami) no anin, inklui mós filtrasaun foer. Ai-parapa ne’e fó importante liu ba balada ikan hodi halo knuk fatin tolun, inklui mós espesie sira seluk ne’ebé moris iha bee laran.
Tuir observasaun Naunil Media iha fatin kuda Ai-Parapa ne’e, PR Lú Olo ho espoza, PM Taur ho espoza, PTR ho espoza, Xefe Estadu Maiór Jenerál F-FDTL, Maijór Jenerál Lere, lider sira ne’e kaer ai-parapa oan ida-idak hodi kuda ai-oan hakonu ho sentimentu kontente tebes, sai hanesan memória ida ba futuru no haburas fila fali natureza iha tasi ibun Metinar, tanba oras ai-parapa komesa menus iha area tasi ibun sira.Vit
