Traballadór Nain-10 iha Australia Hetan Ona Asistensia Imediata
Naunil Media (Díli), Ministra Negósius Estranjeirus no Kooperasaun (MNEC), Adaljiza Magno, informa vítima insendiu traballadór nain-10 iha Australia dadaun ne’e, sira hetan ona apoiu asistensia imediata husi Goovernu Timor-Leste no Governu Australia.
“Hau husu ona ba ita nia embaixadóra iha Australia Ines Almeida atu tau matan ba sira. Governu Australia mos tulun sira no kompana sira ne’ebé servisu ba. Sira haree ona nain-10 mak afetadu, maioria lakon kartaun identidade ho pasaporte”, Ministra Adaljiza Magno, ba jornalista sira iha Ministriu Finansas Aitarak Laran, Kinta (23/07).
Governante ne’e, informa liu-tan entre traballador nain-10 ne’e, nain-9 mak dokumentu lakon Ahi-han no ida mak konsege hetan nia pasaporte.
“Ida ne’e laiha problema, governu sei tulun sira. Dadaun sira hetan ona apoiu husi governu Australia no Timor-Leste ne’ebé fó asistensia diretamente ba sira hodi halo ona sira nia dokumentun ne’ebé lakon ka ahi-han”. Dehan Ministra ne’e. Apm
