Governu TL Simu Ona Milloens U$7,6 Husi UE

Fahe Tutan

Naunil Media (Dili), Embaixadór Uniaun Europeia (UE), Andrew Jacobs, informa loron 02 fulan Jullu tinan 2020 ne’e, Governu Timor-Leste (TL) simu ona milloens U$7,6 husi UE ba ambitu implementasaun reforma estratéjiku iha seitór sira hanesan jestaun finansas públika, nutrisaun, dekonsentrasaun no desentralizasaun.

“Uniaun Europeia iha ambitu fundu europeu dezenvolvimentu, apoiu ona Governu Timor-Leste ho pagamentu anual loron 2 Jullu 2020  hamutuk U$7,6 miloens. Implementasaun ne’e ba seitor sira hanesan jestaun finansas publika, nutrisaun, dekonsentrasaun no desentralijasaun”, Embaixadór UE, Andrew Jacobs, ba jornalista sira, iha Ministeriu Finansas Aitarak Laran, Kinta (23/07).

Embaixadór UE, Andrew Jacobs, informa Uniaun Europeia ho Governu Timor-Leste  hahu dialogu polítika hodi apoiu orsamentu ho montante U$7,6 miloens.

“Fundu husi apoiu sei halo pagamentu bainhira hatudu progresu ba iha implementasaun polítika reforma indikadór sira ne’ebé sai hanesan sasukat ba pagamentu ne’e konkorda ona entre Timor-Leste ho Uniaun Europeia”, tenik Embaixadór UE, Andrew Jacobs.

Diplomata Uniaun Europeia ne’e, dehan pagamentu sira ne’e sei halo diretamente ba iha konta tijoru no sai hanesan orsamentu estadu ida deit ne’ebé la bele separa ho orsamentu estadu sira seluk.

Iha fatin hanesan Ministra Negosius Estrajeirus no Kooperasaun (MNEC), Adaljiza Magno, haktuir dialogu politika entre Uniaun Europeia ho Governu Timor-Leste liu-liu Ministériu Finansas, Ministeriu Saúde, Ministeriu Administrasaun Estatal, tanba sira nia apoiu ne’e fokus ba programa .

“Programa tolu mak jestaun finansiamentu, desentralizasaun ho nutrisaun. Por tantu programa tolu ne’e mak sai prioridade ho apoiu husi Uniaun Europeia”. Dehan Ministra Adajiza. Apm

Leave a Reply

Your email address will not be published.