Garante Estabilidade iha Díli, Henrique : La’os De’it Responsabilidade PNTL
Naunil Media (Díli), Komandante Polísia Nasionál Timor-Leste (PNTL) Munisípiu Díli, Superintente Xefe Henrique Da Costa, hateten mehi PNTL Munisípiu Díli nian mak servisu ba garante paz no estabilidade, maibe atu atinji objetivu refere la’os de’it responsabilidade PNTL.
“PNTL iha mehi atu garante paz no estabilidade iha Díli. PNTL mesak de’it labele atinji, tanba presija kooperasaun no kolaborasaun husi parte akadémiku”, Komandante PNTL Munisípiu Díli, Superintente Xefe Henrique Da Costa, ba jornalista sira hafoin vizita kortezia ba Universidade de Díli (UNDIL), Maskareñas, Kuarta (23/07).
Komandante PNTL Munisípiu Díli, Superintente Xefe Henrique Da Costa, afirma ema hotu tenki iha konsiensia nune’e povu bele moris hakmatek.
“Ita labele iha tan tuda malu, hana malu ho rama ambon, sehakarak halo aktividade la’o ho diak seguransa tenki iha no kria paz”, afirma Superintente Xefe Henrique Da Costa.
Komandante Munisípiu Díli, Superintente Xefe Henrique Da Costa, husu ba estudante Universitáriu sira atu kria Paz no Estabilidade iha Díli hodi garante seguransa iha Díli.
Iha fatin hanesan Reitór UNDIL, José Agustinho da C. Belo Pereira, hateten agradese ba vizita refere no enkoraja sivitas akadémika la’o tuir nafatin lei ne’ebe vigor iha Repúblika Demokrátika Timor-Leste (RDTL).
Durante vizita kortezia refere, Superintente Xefe Henrique da Costa, aprezenta nia-án nu’udar komandante foun lidera PNTL Munisípiu Díli, ba reitór UNDIL ho nia estrutura. Flo/Pau
