Jornalista Nain-31 Hato’o Petisaun ba PN
Naunil Media (Díli), Jornalista Timor Oan hamutuk nain tolu nulu resin ida (31) hatama karta petisaun ba Parlamentu Nasionál (PN) ho objetivu atu hadi’ak Asosiasaun rua (2) hanesan Asosiasaun Jornalista Timor-Leste (AJTL) no Timor-Leste Press Union (TLPU).
“Karta petisaun refere sei hatama mos ba iha Tribunal Rekursus, sira hatama mos ba iha Ministeriu Asuntu Paralamentar no Komunikasaun Sosiál no Sekretariu Estadu Komunikasaun Sosial”, Reprezentante petisionariu atúal jornalista Timor Post, Noemio Falcão, infórma hafoin submete karta petisaun ba Parlamentu Nasionál, Kinta (09/07).
Noemio informa, petisaun ne’e nia konteudu mak kestiona legalidade ba eleisaun ne’ebé mak Konsellu Imprensa (KI) dirije iha loron 4 fulan Jullu 2020, la tuir lei komunikasaun sosial tanba maioria la’os jornalista mak tuir eleisaun hili reprejentante jornalista ba KI maibé ema ativista sira husi liur maka barak.
“Ami jornalista sira konsidera ne’e violasaun tanba konferensia ne’e ami observa katak iha konfrensia ne’e la’os jornalista ativu sira mak partisipa iha eleisaun, maibé ativista sira ne’ebé la’os jornalista mos ba tuir hotu votasaun tan ne’e mak ami kestiona” dehan nia.
Nia espika, iha lei komunikasaun sosia artigu 17 hateten, momos iha ne’eba iha eleisaun atu hili reprezentante jornalista ba iha KI ne’e jornalista sira mak iha direitu atu vota.
“Jornalista sira ne’ebé maka iha kartaun hosi Instituisaun mídia ne’ebé rejistadu notariadu, no rejistadu iha Konsellu imprensa rasik, tan ne’e mak jornalista lubuk ida ne’e kestiona. Tanba sa mak iha konferensia Konsellu imprensa organiza la kumpri lei ida ne’e, ita nia lei komunikasaun sosial ita mak tenke halo tuir, se ita la halo tuir se mak atu halo tuir lei komunikasaun ida ne’e”, haktuir Noemio.
Nia subliña, labele konfuzaun ba estatutu AJTL, tanba estatutu asosiasaun nian sei la bo’ot liu lei, maibé lei mak bo’ot liu, tan ne’e mak iha lei komunikasaun sosial mós hatete iha ne’eba la temi asosiasaun jornalista, maibé temi jornalista sira mak hili ninia reprezentante.
“Maibé kebetulan ita iha Timor-Leste ne’e iha asosiasaun rua mak hanesan AJTL no TLPU, TLPU hili ona ninia reprezentante nain ida no AJTL mos hili, tan ne’e mak ami tau kestaun ba iha legalidade”. Uar
