PN Seidauk Simu Proposta Ruma Hosi Governu
Naunil Media (Díli), Prezidente Parlamentu Nasionál (PPN), Arão Noé de Jesus da Costa Amaral, hateten parlamentu nasionál seidauk simu proposta ruma hosi governu kona-ba pedidu levantamentu ba fundu petroliferu.
Xefe orgaun lejisladór Arão Noé de Jesus da Costa Amaral, ba jornalista sira iha resintu Eskola Filiál Nú Laran, Suku Grincenfor, Postu Administrativu Nain Feto, Kuarta (18/03).
“To’o ohin loron, hau seidauk simu pedidu kona ba levantamentu tuir deklarasaun hosi senhora Ministra Finansa ein-exersisiu. Ita sei iha saldo millaun U$ 215, ne’e katak osan fulan April nian sei iha, so que ita nia sistema katak osan kuandu tun ona ba millaun U$ 200, governu tenke hlo pedidu levantamentu nune’e la bele husik kofre mamuk”, informa PPN Arão Noe.
Tuir Arão Noe, bainhira governu sente orsamentu duodécimo la sufisiente, bele husu ho karater urjensia nune’e aprova lalais molok meadu mars, tanba hafoin parlamentu aprova sei aprezenta ba Prezidente Repúblika hodi halo promulgasaun.
“Fiar katak bankada parlamentar sira sei fo importansia tanba ida ne’e liga ho vida nasaun nian, parlamentu nasionál hein governu submete pedidu levantamentu fundu mina-rai, tanba orsamentu duodésimu atu finansia makina estadu. Autorizasaun parlamentu nian tenke liu hosi asaun ida votasaun no aprovasaun iha plenári tuir lei, dalan seluk la bele governu foti direta, se diak liu tan kompri regra ne’ebe iha, tanba lei Jestaun Finanseira no Lei Fundu Petrolíferu hateten so liu hosi Orsamentu Jerál Estadu ho autrizasaun parlamentu ninian”. Esplika PPN Arão Noe. Ana
