PN Fó Votu Pezár Ba Saudozu ‘Tatamou’ ho ‘Sugiono’

Fahe Tutan

Naunil Media (Díli), Segunda (23/03) ne’e, Parlamentu Nasionál (PN) aprova votu pezár ba saudozu na’in rua, Afonso Rangel alias ‘Tatamou’ ho Victor da Costa ‘Sugiono’, tanba veteranu nain rua ne’e fila hikas ona ba Aman Maromak nia kadunan santu.

Veteranu nain rua husi sira nian peregrinasaun iha mundu iha tinan 2020 ne’e, maibe ho loron, fatin no motivu moras ne’ebé lahanesan. Saudozu Afonso da Costa Rangel ho kodiku rezistensia ‘Tatamou’ hakotu iis iha Hospital Nasionál Guido Valaderes (HNGV) iha loron Sexta 28 fulan fevereiru, tanba sofre moras infesaun, enkuantu saudozu Victor da Costa ho kódiku ‘Sugiono’ hakotu iis iha loron 17fulan Marsu iha nian rezidénsia Bidau.

Parlamentu Nasionál fó votu pezár hanesan omenájen ikus ba sauduzo nain rua, deputadu sira aprova ho votu a favór 63 ba sauduzo Afonso da Costa Rangel no votu a favór 64 ba sauduzo Victor da Costa.

Prezidente Parlamentu Nasional, Arão Noé de Jesus da Costa Amaral, hateten veteranu sira mak funda rai ida ne’e, tanba ne’e sira merese hetan votu pezár.

Iha nia intervensaun, Deputadu FRETILIN, David Dias Ximenes, hateten merese duni no saudozu sira tenke hetan votu pezár hosi Parlamentu Nasionál.

“Ema hotu-hotu hatene se mak sauduzu ‘Tatamou’, mos ba sauduzo Victor , tanba sira nian kontribuisaun mak to’o ohin loron ita hetan ona liverdade” deklara deputadu hosi bankada Fretilin ne’e.

Deputadu José Virgílio R. Ferreira, mos halo nia intervensaun hodi konta tuir katak, “Hau sei lembra kuandu sei tuir sira iha prosesu luta ba libertasaun Nasionál. Hau hatene sira nian kontribuisaun bo’ot tebes ba rai ida ne’e no hanesan jerasaun foun tenke tuir nian ain fatin”. Ana

Leave a Reply

Your email address will not be published.