Deskonfia Hasa’e Folin Foos, AIFAESA no PNTL Halo Inspeksaun Ba Loja Tolu Iha Lautém
Naunil Media (Lautem), Autoridade Inspesaun no Fiskalizasaun Aktividade Ekonómika Sanitária no Alimentár (AIFAESA) servisu hamutuk ho Polísia Nasionál Timor-Leste (PNTL) Munisipiu Lautém, Tersa (24/03) ne’e hala’o inspesaun ba loja tolu (3) Lospalos Vila, tanba deskonfia aproveita situasaun rai laran hodi hasa’e folin foos.
Xefe Divizaun Operasionál AIFAESA, Alfonso Costa ‘Acoit’, hatete inpesaun ne’e bazeia ba reklamasaun hosi komunidade sira iha munisípiu Lautém nian, katak vendedór balun iha Lospalos Vila hasa’e folin foos.
“Ami halo dokumentus hotu, sei halo leitura didi’ak, bainhira nesesáriu tenke submete ba Ministériu Públiku hodi tuir prosesu investigasaun. Loja tolu iha postu administrativu Lospalos mak AIFAESA detekta durante ne’e hasa’e folin fo’os, rua mak halo inspecsaun, ida seluk seida’uk tamba sei taka hela, nune’e iha loraik ka aban ekipa AIFAESA sei ba halo inspeksaun ba loja refere”, informa Xefe Divizaun Operasionál AIFAESA, Alfonso Costa ‘Acoit’ ba jornalista Naunil Media hafoin hala’o inspesaun iha loja Titer.
Xefe Divizaun Operasionál AIFAESA ne’e informa, iha loja tolu mak fa’an sasan fora hosi folin normál, maibe konfirma katak folin normal fali ona.
“Foin dadaun ita konfirma resivu pagamentu durante sira halo negosiasaun, enkuadramentu ne’e Lei (nu4/2011), ne’e espekulasaun katak ida ne’e kontra ona, tanba própriu dekreitu Lei 29/2011, kona presu justu estikula mínimu iha pursentu 10 (%) to’o pursentu 15 (%) ba vendedór sira atu hetan lukru, maibé sira hasa’e folin liu limitasaun Lei hateten ida ne’e krime”, esplika Nia.
Nia esplika liu tan, bainhira AIFAESA indentifika vendedór sira ne’ebe hasa’e folin sasan, ne’e konsidera komete krime no PNTL sei kaptura hodi submete ba Ministériu Públiku atu halo investigasaun.
“Husu ba komunidade sira iha Munisipiu Lautém atu labele pániku tamba dadaun governu konfirma ona katak estok sei aguenta to’o fulan 4 to’o 5. Posibildade ita nia sentru lojístika nasionál sei halo akijisaun mai kuaze 30 ate 40 tonelada atu aguenta to’o fim do ano”. dedan Nia. Lat
