PR Lú Olo Haruka Proposta Estadu Emerjénsia Ba PN

Naunil Media (Díli), Xefe Kaza Sívil Prezidensía Repúblika, Francisco María de Vasconcelos, informa ohin ou tarde liu aban, Prezidente Repúblika (PR) Fracisco Guterres ‘Lú Olo’ haruka proposta estadu emerjénsia ba Parlamentu Nasionál (PN) hodi husu autorizasaun nune’e Xefe Estadu Timor-Leste bele dekreta.

Francisco María de Vasconcelos, ba jornalista sira hafoin akompaña reuniaun Konsellu Superior Defeza no Seguransa (KSDS) no Konsellu Estadu (KE) mak hala’o iha Palasíu Prezidensiál Bairro Pite, Tersa (24/03).

“Ohin duni, ka tarde liu aban sei haruka ba parlamentu nasionál, tanba ne’e urjente no kleur liu mak aban Prezidente Repúblika sei haruka ba Parlamentu Nasionál. Bainhira Parlamentu Nasionál autoriza, Prezidente Repúblika sei dekreta estadu emerjénsia”, hateten xefe kaza sivíl Prezidensía Repúblika, Francisco María de Vasconcelos.

Nia hatutan, Xefe Estadu Timor-Leste simu pedidu governu iha Segunda (23/03), hodi husu ba Prezidente Repúblika atu atu dekreta estadu emerjésia.

Hafoin simu pedidu governu kosntitusionál da-ualu nian, Xefe Estadu Timor-Leste konvoka kedas reuniaun Konsellu Superiór Defeza no Seguransa no Konsellu Estadu. Iha ne’ebe parte dader PR Lú Olo hala’o reuniaun ho Konsellu Superior Defeza no Seguransa no parte lorokraik reuniaun ho Konsellu Estadu.

“Prezidente Repúblika konvida mos ema tékniku nain rua, mak doutór Rui María de Araújo no doutóra Daninha Coelho, hod fó mos opiniaun ba konsellu sira. Konsellu sira iha ninia opiniaun fó ba Prezidente Repúblika atu hato’o karta ba Parlamentu Nasionál atu autoriza no PR hodi bele dekreta estadu emerjénsia” dehan Xefe Kaza Sivíl ne’e.

Membru Konsellu Superior Defeza no Seguransa ne’ebé sei partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negósiu Estranjeiru no Kooperasaun Dionísio Babo, Ministru Defeza no Seguransa Filomeno Paixão,  Ministru Justisa Manuel Carceres, hosi Parlamentu Nasionál, Aderito Hugo da Costa, David Dias Ximenes, Abel Pires da Silva, Xefe Estadu Maiór Jenerál F-FDTL, Maijór Jenerál Lere Anan Timur, Komisáriu PNTL Faustino da Costa, Diretór Jerál Servisu Intelijénsia Manuel Serrano, José Manuel Fernandes ‘Nakfilak’, Cristina da Silva no sei konvida Eis Primeiru Ministru no Ministru Saúde Rui Araújo no Infectologista Danina Coelho no Diretór Ezekutivu FONGTIL Daniel Santos.

Membru Konsellu Estadu ne’ebé sei partisipa iha reuniaun ne’e mak Prezidente Repúblika Francisco Guterres Lú Olo, Primeiru Ministru Taur Matan Ruak, Eis Prezidente Repúblika sira,  Prezidente Parlamentu Nasionál Arão Noe, no membru ne’ebé nomea hosi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea hosi Parlamentu Nasionál: Eduardo de Deus Dusae’, Aurora Ximenes,  José Cornelio Guterres, Árcangelo de Jesus Gouveia Leite, José dos Santos ‘Naimori Bucar’.

Reuniaun PR Lú Olo ho membru Konsellu Superior Defeza no Seguransa nian hahu iha tuku 09 to’o tuku 11, no reuniaun ho membru Konsellu Estadu hahu tuku 11:10 to’o remata tuku 13:05. Lop