NewsSaude

Fatin Kuarentina Seidauk Priense Rekizitu OMS

Fahe Tutan

Naunil Media (Díli), Diretóra Jerál Prestasaun Saúde, Ministeriu Saúde (MS), Odete Viegas, hateten fatin karantina seidauk priense regra Organizasaun Mundiál Saude (OMS) hodi prevene Covid-19 tamba dadaun ne’e tau hamutuk ema nain tolu kuartu ida.

Diretóra Jerál Prestasaun Saúde, Ministeriu Saúde (MS), Odete Viegas, ba jornalista sira hafoin enkontru ho ekipa jestaun krize, iha Sentru Konvensaun Díli (CCD-Sigla Português), Tersa (31/03).

“Fatin kuarentina ita seidauk priense tuir regra Organizasaun Saúde Mundial (OMS) se ita priense tenke ema ida kuartu ida, tenke iha haris fatin ida, maibe situasaun mak ida ne’e pelumenus ita halo netik buat ruma ita hatama sira iha fatin ida maibe ne’e halo ekipa fasíl para atu kontrola sira”, dehan Odete.

Odete haktuir, liuhosi enkontru nia hato’o ona ba governu, fatin kuarentina ba oin atu priense kriteria OMS nian governu presiza kontratu hotel sira iha Díli laran hotu.

“Ohin iha enkontru ne’e ami mos sujere ona, se hakarak ita priense kriteria OMS nian entaun estadu tenke haree fatin hoteis ga atu laos hoteis iha Díli laran ne’e ita bele foti atu nune’e ita bele tau duni ema ida iha kuartu ida, ita espera katak aban ba oin ne’e governu bele halo buat ruma ba fatin kuarentina” dehan Odete.

Tuir dadus ne’ebe Ministeriu Saúde update iha pajina Palacio das Cinzas iha loron 31 fulan Marsu, fatin kuarentina 16, total ema iha kuarentina nain 1198 iha total ne’e nain 234 passa ona kuarentina durante loron 14 no sei akompaña iha fatin kuarentina governu prepara hamutuk nain 964.

Aleinde ida ne’e mos iha suspeitu nain 11, pozitivu nain 1 no negativu nain 10, maibe seidauk iha rekopera no mate. Uar

Leave a Reply

Your email address will not be published. Required fields are marked *