Millaun U$ 150 Sufisiente Ka Lae, Depende Ba Gravidade COVID-19 Iha TL
Naunila Media (Díli), Ministra Finansas (MF) Ein-Ezersisíu no atual Vise- Minstra Finansas, Sara Lobo Brites, deklara despeza hosi orsamentu millaun U$ 150 ne’e sei depende ba corona virus (COVID-19) tanba orsamnetu ne’e eskluzivamente ba pandemia covid-19 nian.
“Millaun U$ 150 ne’e sufisiente ka la sufisiente ne’e depende ba gravidade COVID-19. Se situasaun pozitivu ida deit hanesan agora nian komesa rekopera dau-daun ona, MAROMAK tulun ita la afeta ona. Dala ruma ita la gasta tan ona, maibé kuandu ita tama iha situasaun ida grave loós. Hanesan esperiénsia rai seluk nian mak millaun U$ 150 ne’e la to’o ida”, dehan Ministra Finansas ein-exercíciu no atual Vise-Ministra Finansas, Sara Lobo Brites, ba jornalista sira hafoin partisipa enkontru redasaun finál ba pedidu levantamentu millaun U$ 250, iha Parlamentu Nasionál, Sexta (03/04)
“Ezekusaun orsamentu millaun U$ 250 ne’e la sujeita ba lei orsamentu no jestaun Finansas (lei númeru 13/2009), nian iha artigu 31 (rejime duodecimal), tanba Parlamentu Nasionál preve ona artigu únika ida katak ninian ezekusaun iha flexsibilidade. Agora despeza ba COVID-19 ne’e tuir ami nia proposta, ami hato’o ba komponente tolu mak hanesan primeriu mak emerjénsia sanitária kompostu hosi despeza sira ba iha akizisasaun medikamentu, ekipamentu materiál ba iha ita nia saúde nian. Tenke tau osan ba ita nia profisionál saúde sira, defeza, seguransa, seguransa sivíl. Entaun tenke apoia ruma ba sira hodi hala’o sira nia kna’ár s”, hateten Sara Lobo.
Nia dehan, orsamentu ne’e sei aloka ba fatin hirak ne’ebé governu deside hanesan kuarentina, fronteria, suspeitu ba Covid-19 kuandu afeta barak entaun governu tenke serbisu mais abranje liu tan. Entretantu iha Kinta ne’e (02/04/2020), Parlamentu Nasionál fó autorizasaun ba governu hodi halo levantamentu ba fundu petrolíferu ho montante hamutuk millaun U$ 250. Hosi fundu ne’e sei koloka hanesan millaun U$ 100 reforsa kofre estadu hodi finansia servisu administrasaun públika no millaun U$ 150 antesipa despeza hasoru COVID-19 no rekuperasaun atividade ekonómika iha rai laran. Ana
