Sidadaun Iha Kuarentena Tenke Kompri Regra Distansia Sosiál

Fahe Tutan

Naunil Média (Díli), Porta voz sala situasaun Sentru Intregadu Jestaun Krize (CIJC-Sigla Português), Odete Viegas Da Silva, husu sidadaun sira mak iha kuarentena, tenke kompri regra distansia sosiál hodi evita transmisaun moras surtu corona virus (COVID-19).

Porta voz sala situasaun Sentru Intregadu Jestaun Krize, Odete Viegas Da Silva ba jornalista iha Centro de Convenções de Díli (CCD), Kinta (08/04).

“Ba okupante sira atu hakmatek iha ida-idak nian kuartu laran, atu nune’e bele minimiza kontaktu hodi garante ijiene iha fatin kuarentena laran no labele fuma no labele hemu tua iha fatin kuarentena laran”, Odete dehan.

Nia husu, “Kumpri regra sira ne’ebé fó sai ona, iha kuarentena evita triste, atu nune’e mantein ita nian imunidade. Ba sira ne’ebé mak sai hosi ona fatin kuarentena, tenke kompri distansia sosiál, fase liman bei-beik, karik iha sintomas ruma, hanesan isin manas, mear no dada i’is-bo’ot halo favór kontaktu ba númeru 119 ba profísionál saúde ne’ebé durante ne’e akompaña ba sira nian kondisaun iha kuarentena”, nia haktuir.

Nia husu mos ba komunidade sira hela iha uma rasik tenke fó kontribuisaun no kolabora ho estadu, nune’e bele hamutuk hodi kombate surtu COVID-19.  

“Ita haree ba situasaun agora rai laran movimentu kontinua tama no sai hela deit. Maibé iha diskusaun Konsellu Ministru nian atu hapara Timor oan sira tama hosi fronteira ne’e. Sala situasaun mos fo ona proposta sira ne’e. Espera katak iha tempu badak bele iha ona reposta ba ida ne’e”. dehan Odete. Ana

Leave a Reply

Your email address will not be published.