Semana Oin Governu Sei Taka Totál Aeroportu no Portu

Fahe Tutan

Naunil Media (Díli), Ministru Negosius Estranjeirus no Koperasaun (MNEK), Deonísio Babo Soares, hateten semana oin governu sei taka kompletu Aeropotu no portu hodi hapara viajem tomak, tamba ne’e husu Timor oan hotu ne’ebe sei iha rai liur (nasaun afeitadu COVID-19) atu hakmatek iha nasaun ne’ebé dadaun ne’e sira hela bá.

Ministru Negosius Estranjeirus no Koperasaun (MNEK), Deonísio Babo Soares,ba jornalista sira hafoin aprezenta  karta kredensiál embaixadór extraórdináriu, Plenipotenciário Kinefuchi Masami hosi Japão ba Timor-Leste, mak hala’o iha Palásiu Presidensiál Bairro Pité, Tersa (07/04).

“Semana oin governu sei taka kompletu Aeropotu no Portu hodi hapara viajem tomak, tamba ne’e husu Timor oan hotu atu hakmatek iha nasaun ne’ebé agora dadaun sira hela bá. Dadaun ne’e governu Timor-Leste buka dalan hodi  serbisu hamutuk ho embaixada sira iha Timor-Leste hodi nafatin  fó apoiu ba Timor oan hotu iha estranjeirus”, Tenik membru governu konstitusionál da-ualu, Deonísio Babo Soares.  

Tuir governante ne’e, agora la’ós ona tempu ba Timor oan sira iha rai-liur fila mai Timor, maibe prefere sira (timor oan) atu mantein kalma iha fatin, nasaun sira ne’ebé sira hela bá.

“Husu ba Timor oan hirak ne’ebé hela iha rai-liur, dadaun la’os tempu atu fila mai timor, favór ida hela lai iha ne’ebá. Timor oan hotu iha rai liur atu labele la’o sai nomós fiar ba sistema saúde iha nasaun refere no hela hakmatek iha uma hodi hadok-an hosi virus refere”, dehan Deonísio Babo Soares.

Timor oan hirak ne’ebé mak dadaun ne’e serbisu no eskola iha rai liur tuir dadus ne’ebé rejista, hamutuk 50 mill ital, barak liu iha nasaun Korea-Sul, Australia, Inglatera, no Indonesia. Estudante timor oan barak liu mak Indonesia  totál 8.000, enkuantu kuase 1.000 mak fila ona no 7.000 mak seidauk fila. Dms

Leave a Reply

Your email address will not be published.