Kada Loron Laboratoriu Nasionál Bele Halo Teste Ba Amostra 72

Naunil Media (Díli), Kordenadór ba Ekipa Estudu no Análiza Risku iha Sentru Integradu ba Jestaun Krize (CIGC-Sigla Português), Francisco Guterres, informa ho kapasidade laboratóriu Nasionál, kada loron bele ona halo teste amostra raan 71 ba kazu COVID-19.

“Ita-nia laboratóriu nasionál agora daudaun konsege ona halo teste amostra raan ba kada loron 72, ne’ebé uluk ita halo teste 12, agora sa’e ona ba 72 kada loron. Ita espera katak ekipamentu foun kuandu tama mak ita bele hasa’e teste amostra ba 300 ba kazu COVID-19 kada loron”, hateten Kordenadór ba Ekipa Estudu no Análiza Risku iha Sentru Integradu ba Jestaun Krize (CIGC-Sigla Português), Francisco Guterres, durante halo aprezentasaun iha plenária estraordinária kona-ba prevensaun no kombate surtu COVID-19 no ezekusaun deklarasaun Estadu Emerjénsia, iha Parlamentu Nasionál, Kinta (16/04).

Tuir Nia,  kuandu kada loron bele halo ona teste amostra raan ba pesoál na’in-300, maka sei bele halo teste amostra raan ba abitante sira iha kuarentena no sidadaun sira no’abó fila husi nasaun afatadu sira.

“Ita fásil ona bele halo teste ema sira ne’ebé fila hosi nasaun afetadu sira, maski liu ona loron 14 mos ita bele halo teste amostra bainhira mosu sintoma ruma ba COVID-19 no buka tuir sira nia kontaktu ho família hodi halo teste hotu”, akresenta eis Sekretáriu Estadu ne’e.

Nia relata, daudaun Laboratóriu Nasionál iha kapasidade atu halo teste amostra raan ba ema-sira ne’ebé suspeitu ba COVID-19, maibé CIGC mós kontinua buka meiu atu bele uza tan laboratóriu rezerva hodi prepara to’o senáriu piór liu ba propagasaun COVID-19 iha Timor-Leste.

“Ami sei husu laboratóriu Univercidade Nacional Timor Lorosa’e (UNTL) iha Hera atu sai hanesan laboratóriu rezerva, nune’e bainhira mosu senáriu aat liu ona mak bele Ami sei husu laboratóriu Univercidade Nacional Timor Lorosa’e (UNTL) iha Hera atu sai hanesan laboratóriu rezerva, nune’e bainhira mosu senáriu aat liu ona mak bele uza laboratóriu UNTL hodi ajuda halo teste”, akresenta Nia.

Antes ne’e, Governu liuhosi Ministériu Saúde Kuarta (25/03) lansa ona mós projetu konstrusaun sala laboratóriu patolojia no mikrobolojia iha Ospitál Nasionál Guido Valadares (HNGV-Sigla Português) hodi halo teste ba kazu Corona vírus.

Obra ne’e lansa diretamente hosi eis vise Ministra Saúde Kuidadu Saúde Primária, Élia dos Reis Amaral ho parseiru sira no obra ne’e gastu orsamentu rihun U$350.

Projeitu ne’e implementa hosi Kompaña RMS ho Menzies ho durasaun fulan-tolu.  hahú marsu to’o junu 2020. Orsamentu ba obra ne’e Ministériu Saúde hetan apoiu hosi Menzies School of Research Darwin, Governu UK no Governu Austrália. Menzies School of Research Darwin mós sei apoiu fó formasaun rekursu umanu ba pesoál laboratóriu liliu iha área mikrobiolojia no seluk tan. Ana