Konfirmadu Pozitivu COVID-19 Iha TL Aumenta Ba Nain 18, Ida Rekopera
Naunil Media (Díli), Porta voz Sentru Integradu Jestaun Krize (CIGC-Sigla Português), Odete Viegas da Silva, informa kazu konfirmadu ba moras surtu COVID-19 iha Timor-Leste (TL) hamutuk nain 18, maibe ida mak rekopera ona ona.
Porta voz CIGC, Odete Viegas da Silva, informa ba jornalista sira liuhosi konferensi inprensa iha Sentru Media, Centro de Convencões de Díli (CCD), Kinta (16/04).
“Kazu aktual ba moras COVID-19 iha Timor-Leste konfirmadu loron ohin (Kinta 16/04) ne’e, suspeitu hamutuk nain 229, provavél nain haat, iha negativu 195, hein rejultadu 12 pesoas, konfirmadu nain 18, tanba iha aumentu nain 10 kazus pozitivu. Nain 18 ne’e ida mak rekopera ona, enkuantu kazu na’in 10 ne’e nafatin hosi Hotel Katuas” Realata atual Diretóra Servisu Prestasaun Saúde, Ministériu Saúde (MS), Odete Viegas da Silva.
Nia relata liu-tan, “Totál ema iha kuarentena obrigatóriu hamutuk 577, hosi númeru ne’e maioria hosi munisipiu Díli 456 no munisipiu seluk 111. Nain neén iha auto kuarentena iha munisipiu seluk, ema ne’ebe pasa ona loron 14 hamutuk nain 1339, hosi Díli 1122, husi munisipiu seluk 217”.
Antes ne’e iha Tersa 14/4, porta voz CIGC Doutor Rui Maria de Araújo anunsia kazu foun komfirmadu timor-oan nain 2 tuir rezultadu teste laboratóriu pozitivu ba COVID-19 no transfere ona ba fatin Izolamentu Sentru Saúde Vera Cruz.
Iha kinta 16/04 porta voz CIGC, Odete Viegas da Silva anunsia tan dadus konfirmadu pozitivu ba moras COVID-19 nain 10 sei iha fatin kuarantena obrigatóriu Hotel Katuas, sira seluk muda sai ona ba fatin kuarenten iha Tasi-Tolu iha Kuarta 15/04. Uar/Apm
