Prolonga EE, Governu Tenke Aseleira Subsídiu Ba Povulasaun

Fahe Tutan

Naunil Media (Díli), Prezidente Parlamentu Nasionál (PPN), Arão Noé de Jesus da Costa Amaral, hateten governu hakarak prolonga tempu Estadu Emerjénsia ne’e, entaun governu tenke aseleira subsísdiu ba populasaun sira nune’e populasaun labele hamlaha iha implementasaun.

PPN Arão Noe de Jesus da Costa Amaral, ba jornalista sira iha resintu Uma Fukun, Segunda (20/04).

“Oras ne’e populasaun barak mak halerik ona, tanba laiha osan atu sustenta família iha estadu emerjénsia ne’e. Hau mós preokupa ho situadaun ne’e no simu mós mensajen no lamentasaun barak hosi populasaun, tanba ne’e governu tenke aseleira ona subsísiu”, informa PPN, Arão Noe.

Nia adianta, “Iha lamentasaun barak hosi komunidade, hosi populasaun sira ne’ebé laiha servisu. Susar hetan osan iha estadu emerjénsia ne’e, populasaun sira ne’ebé buka moris liuhosi movimentu transporte públiku hanesan mirkolete ho taksi, defisil tebes hetan iha implementasaun Estadu Emerjénsia ne’e”.

“Ho Estadu Emerjénsia fulan ida, sira-nia ekonomia tún tebes. nesesidade bázika de’it mós sira labele hola tanba salária laiha. Tanba ne’e mak ha’u hanoin, sé hakarak extende Estadu Emerjénsia ne’e entaun Governu tenke aselera ona implementasaun subsídiu ba ema sira ne’ebé laiha saláriu, mas la’ós ba hotu-hotu”, akresenta Arão Noe.  

Tuir Arão Noe, katak di’akliu subsídiu ne’e fó de’it ba ema-sira ne’ebé lakon serbisu no laiha serbisu, enkuantu rekuperasaun ekonómika labele ko’alia iha situasaun  atuál.

“Observa katak ho implementasaun Estadu Emerjénsia ne’e halo populasaun barak la asesu ba merkadu hodi hetan netik osan, tanba ne’e governu tenke aselera uluk subsídiu ne’e, hafoin bele halo extensaun ba estadu emerjénsia ne’e”. dehan Nia. Ana

Leave a Reply

Your email address will not be published.