Sidadaun Estranjeiru Ida Monu Iha Estrada Kampung Alor, Kauza La’ós COVID-19
Naunil Media (Díli), Liuhosi Sala Situasaun, Porta voz Sentru Integradu Jestaun Krize (CIGC-Sigla português), Rui Maria Araújo, klarifika estranjeiru hosi Pakistaun nain ida ne’ebé monu iha estrada públiku ninin área Kampu Alor, Munisípiu Dili, ninia kauza la’ós moras Covid-19.
Porta voz CIGC, Rui Maria Araújo, ba jornalista sira liuhosi komunikadu imprensa, iha Centro de Convenções de Díli (CCD), Kuarta (29/04).
“Ekipa médiku sira hosi postu saúde Kampu Alor rasik mak halo ona klarifikasaun no informa ba CIGC, katak sidadaun estranjeiru Pakistaun ne’e sofre moras seluk, la’ós kauza hosi moras COVID-19. Nune’e sidadaun ne’e ambulánsia lori ona ba ospitál”,haktuir dr. Rui Maria de Araújo.
Eis Primeiru Ministru (PM), Rui Maria de Araújo, apela “Hau husu ba públiku tomak atu labele fahe informasaun ne’ebé mak la loós iha media sosiál liu-liu facebook. Tanba ne’epúbliku fiar mak informasaun ne’ebé hosi mídia no CIGC fó sai kada loron ba públiku sira”.
“Sidadaun estranjeiru ne’e agora tuir hela prosesu tratamentu saúde iha Ospitál Nasionál Guido Valadares (HNGV)”.Dehan dr. Rui Maria de Araújo. Ana
