Governu Oferese Subsídiu Pulsa Eletrisidade Daruak Ba Kliente 160,555 Iha TL

Fahe Tutan

Naunil Media (Díli), Governu liuhosi Ministéru Obras Públika (MOP) kontinua distribui subsídiu  pulsa eletrisidade U$15  fase daruak nian ba kliente sira ho pré-pago hamutuk  160,555 iha Timor-Leste (TL).

Apoiu subsídiu ne’e, MOP liu-hosi despaixu númeru ref, 804/MOP/V/2020 kona-ba medida apoia ba populasaun durante iha  Estadu Emerjénsia no enerjia elétrisidade no bee. Nune’e  MOP oferese valór U$15 ba kada kliente pré-pago ne’ebé ativu  iha teritóriu laran tomak.

“Atribui-tan valor U$15 (ekivalenti 125 kWh) ba kada kliente pré-pago, ho total kliente pré-pago mak 160,555. Segunda  fase ida ne’e, MOP konsidera sei atribuí mos subsídiu pagamento 50%, hosi tarifasreferentes ba konsumedóres eletrisidade iha regime pós-pago iha periodu atuál estadu emerjénsia, ho total kliente pós-pago mak 1,614”, Ministru Obras Públika (MOP), Salvador Eugénio Soares dos Res Pires, ba jornalista sira hafoir asina akordu distribuisaun pulsa eletrisidade ho operadór tolu Timor-Telecom, Telemor no Telkomsel, iha edifisiu Eletrisidade de Timor-Leste (EDTL), Sesta (08/05)

Nia informa, operadór tolu, Timor Telecom, Telemor no Telkomcel sei fasilita distribuisaun subsídiu pulsa eletrisidade liu-hosi númeru Hotline úniku 1215,  hahú dia 8 to’o 27 Maiu ne’e.

Nia esplika, objetivu fó subsídiu pulsa eletrisidade liuhosi hotline operadór sira ne’e atu kontinua kontribui ba prevensaun COVID-19 labele hadaet ba komunidade.

“Hanesan informasaun ba ita hotu. MOP liuhosi  EDTL rejista katak iha fase atribuisaun primeiru implementasaun, total kliente ne’ebé mak hetan ka ativa hamutuk 128.657 (ekivalente 80% ) hosi totál klientes 160.555”, tenik Nia.

Ikus liu, membru governu konstitusionál da-ualu ne’e agradese wain ba parseiro sira MOP nian, liu-liu operadór tolu ne’e, tanba fasilita no licensa ba númeru hotline refere. Mcr

Leave a Reply

Your email address will not be published.