COVID-19 Iha TL : Kazu Foun Laiha, Konfirmadu Mantein 24
Naunil Media (Díli), Liuhosi Sala Situasaun, Porta voz Sentru Integradu Jestaun Krize (CIGC-Sigla Português) dr. Rui Maria de Araújo, informa kazu COVID-19 iha Timor-Leste konfirmadu sei mantein nain 24, enkuantu kazu laiha kazu foun no pasiente rekuperadu hamutuk nain 23.
“Totál komulativu kazu konfirmadu laiha mudansa no nafatin 24, total kazu konfirmadu foun mos laiha no mantein nafatin zero. Durante semana tolu ona, totál kazu rekuperadu laiha mudansa kompara ho horseik hamutuk 23, hosi nain 23 ne’e 19 mak komfirmadu provavel 4, kazu ne’ebé ativu iha fatin izolamentu Vera Cruz hamutuk nain 5”, hatete Porta-voz CIGC, dr. Rui Maria de Araújo, ba jornalista sira liuhosi komunikadu imprensa iha Centro de Covenções de Díli (CCD), Kinta (14/05).
dr. Rui informa, total ezame laboratóriu ne’ebé hala’o durante fulan hira nia laran liu-ba, totál kumulativu hamutuk nain 1220.
“Exame laboratóriu ne’ebé halo durante fulan hirak ne’e nia laran, totál kumulativu to’o ona nain 1220, horseik iha 1180, ne’e dadus hosi tuku 12:00 otl ohin nian”, haktuir Eis Primeiru Ministru dr. Rui.
“Totál kumulativu hosi amostra laboratorium ne’ebé hein rezultadu hamutuk nain 343 no totál kumulativu rejultadu laboratóriu teste negativu hamutuk nain 855”, relata Nia.
Eis Ministru Saúde, dr. Rui Maria de Araújo, dehan “Totál amostra hosi vijilansia sintinela ne’ebé hala’o hosi munisípiu no hospitais sira hamutuk nain 637. Hosi nain 637 ne’e maizu menus atinji ona porsentu 24 (%) mak hatudu ona rezultadu negative. Dadaun ne’e iha kuarentena ka konfinamentu obrigatóriu to’o ohin tuku 12:00 otl meidia hamutuk nain 85, nain 3 auto-kuarentena iha Díli, kuarentena fasilidade hosi governu nian iha Díli 56, nain 26 kuarentena iha fasilidade governu nian, iha munisípiu seluk”. Apm/Pau
