PLP Konsidera Arão Noé Lakompriende Rejimentu PN

Naunil Media (Díli), Vise Xefe bankada Partidu Libertasaun Popular (PLP), Francisco de Vasconcelhos, hateten Prezidente Parlamentu Nasional (PPN), Arão Noé de Jesus da Costa Amaral lakompriende no viola ona rejimentu Parlamentu Nasionál (PN), tanba ne’e tenke kuidadu.

“Prezidente Parlamentu Nasionál lakompreinde regras, labele interfere Prezidente Republika, tanba disolusaun ba Parlamentu Nasionál ne’e kompetensia konstitusionál Prezidente Republika nian”, hateten Vasconcelhos, iha areadór  Uma Fukun, Kinta (14/05).

Deputadu PLP ne’e argumenta, “Prezidente Parlamentu nian kna’ár mak asegura funsionamentu Parlamentu Nasionál no aktividade tenke la’o nafitin, agora Prezidente Parlamentu sala tiha ona, tanba rezolusaun Estadu Emerjénsia nian iha artigu 6, katak oragun haat ne’e tenke funsiona nafatin no iha konstituisaun Republika hatete iha periodu Estadu Emerjénsia Prezidente Repúblika labele disolve Parlament Nasionál. Hatudu momos katak, lakompriende konstituisaun Republika, tanba husu fali  Prezidente Republika atu dizolve Parlamentu Nasional iha periodu Estadu Emerjénsia”.  

Nia akresenta, prezidente Parlamentu Nasional laiha resposta ba pedidu distituisaun ne’e konsidera krimi abuzu poder, tamba liu tiha ona prazu.

“La konsidera ami nia pedidu distituisaun ne’e krimi abuzu poder, maibe ita sei haree par resolve, laiha problema. Kuandu Prezidente Parlamentu la tau ba ajenda liu tiha ona loron prazu ne’ebe iha regiment, ne’e katak Prezidente Parlamentu sala no ne’e hatudu katak abuzu poder. Lalika halo tun sa’e, di’ak liu mai par organiza marka ajenda ita rezolve, problema agora iha ne’e deputadu maioria absoluta ne’e ita atu halo tan saida”, tenik Nia.

Nia esplika, Pedidu rekerementu atu autoriza vice Prezidente Parlamentu ne’e, tanba Prezidente Parlamentu Nasional la halo ajenda ba pedidu distituisaun, liu ona prazu loron lima.

“Aumenta tan, Prezidente Parlamentu lahatene tan regimentu, ohin halo tiha komunikadu imprensa, nia lakomprende konstituisaun, agora mai ko’alia tan rekerementu”, realsa Nia. 

“Liu tiha ona loron lima, entaun ami haruka tan rekerementu ida husu vice Prezidente Parlamentu nain rua lidera aplika artigu 22 pontu um rejimentu Parlamentu Nasionál nian”, esplika Nia.

Ikus liu, Nia dehan, “Iha rejimentu ne’e, kuandu iha vise sira mos iha impedimentu hanesan Prezidente, entaun iha ne’e se mak idade bo’ot bele lidera plenaria ida ne’e rejimentu mak fo dalan. Hau ko’alia ne’e rejimentu, tanba regimentu hatete katak, Prezidente iha impedimentu Vice ba lidera, se vice iha impedimentu ema idade bo’ot iha deputadu bele ba lidera”. Uar